Путин Россиянинг коронавирусга қарши вакцинасини биринчилардан бўлиб оладиган мамлакатни айтди

Аввалроқ Беларусь фуқаролари Россияда ишлаб чиқарилган коронавирусга қарши вакцина синовининг учинчи босқичида ихтиёрий тартибда иштирок этишлари маълум қилинганди. Вакцина халқаро синовларининг якуний учинчи босқичида 40 минг одамда синовдан ўтказилади.

Фото: РИА Новости

Россия президенти Владимир Путин Беларусь президенти Александр Лукашенко билан ушбу мамлакатни Россиянинг коронавирусга қарши вакцинаси қўшимча синовларининг якуний босқичи иштирокчилари рўйхатига киритишга келишиб олганини маълум қилди.

«Александр Григорьевич билан Беларусь вакцинамизнинг қўшимча синовлари якуний босқичига қўшилишига келишиб олдик. Кейин эса республика ушбу препаратни оладиган дастлабки мамлакатлардан бири бўлади», — деди Путин.

Аввалроқ Беларусь фуқаролари Россияда ишлаб чиқарилган коронавирусга қарши вакцина синовининг учинчи босқичида ихтиёрий тартибда иштирок этишлари хабар қилинганди.

Коронавирусга қарши “Спутник V” вакцинаси Н.Гамалея номидаги марказ томонидан ишлаб чиқилган.

Вакцина халқаро синовларининг якуний 3-босқичида 40 минг одамда синовдан ўтказилади.

Синовлар Россиядан ташқари, Саудия Арабистони, БАА, Филиппинда ўтказилади. Шунингдек, Бразилия ва Ҳиндистоннинг иштирок этиши имконияти кўриб чиқилмоқда.

Тайёрлаган Дилшод Аскаров

#Россия #вакцина

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.