Японияда тўфон сабабли 9 млнга яқин киши эвакуация қилинишга чақирилди

Япониянинг жануби-ғарбий қисмига ёпирилган “Хайшэн” тўфони оқибатида камида 36 киши жабрланди. Ҳукумат 8,59 млн кишини эвакуация қилинишга чақирган.

Энг кўп жабрланганлар Кюсю оролининг Нагасаки, Кагосима ва Кумамото префектураларига тўғри келган. 

Япония бош вазири Синдзо Абэ 6 сентябрда ҳукуматнинг тезкор йиғилишини ўтказиб, унда маҳаллий аҳолини ҳимоя қилиш учун барча ишни амалга ошириш вазифасини топширган. 

Тўфон ичидаги шамол тезлиги сониясига 60 метрни ташкил қилмоқда. Таъкидланишича, 7 сентябрь соат 18гача Кюсюга 500 ммгача ёғингарчилик тушиши мумкин.

Айни вақтда супертўфон Жанубий Кореяга 35 км/соат тезлик билан йўналмоқда ва яқин соатларда Корея яриморолига ёпирилиши кутилмоқда. Шу сабабли мамлакатда хавфлиликнинг энг юқори даражаси эълон қилинган. Тўфон айниқса Япон денгизи бўйида жойлашган Пусан ва Чежу курорт оролига катта хавф солмоқда.

Ўз навбатида Жанубий Корея президент Мун Чжэ Ин ҳам тўфондан кўриладиган зарарни минимумга келтириш учун барча чораларни кўришни буюрган. 

“Хайшэн” Японияга охирги ҳафта ичида ёпирилаётган иккинчи тўфондир. Бир неча кун аввал Кунчиқар мамлакатда охирги бир неча йил ичидаги энг кучли тўфонлардан бири бўлган “Майсак” авж олганди. Тўфон сабабли Японияда мактаблар ёпилган, поездлар қатнови тўхтаган. Юзлаб авиарейслар бекор қилинган.

“Майсак”, шунингдек, Шимолий Кореяга катта талафот етказган. Маҳаллий ОАВда маълум қилинишича, тўфон ўнлаб қурбонларга олиб келган.