Трамп номзоди Нобел мукофотига илгари сурилди

Норвегиялик депутатнинг таъкидлашича, Дональд Трамп сиёсий фаолияти давомида тинчлик ўрнатилиши учун бошқа номзодларга нисбатан кўпроқ иш қилган.

Фото: REUTERS/Jonathan Ernst

Норвегиянинг «Ривожланиш партияси» депутати Кристиан Тибринг-Гедде АҚШ президенти Дональд Трамп номзодини Нобел мукофотига илгари сурди. Бу ҳақда Fox News телеканали хабар бермоқда.

Депутат Нобел қўмитасига мактуб йўллаб, унда америкалик етакчи нима учун ушбу мукофотга муносиб эканлигига изоҳ берган. Унинг ёзишича, Трамп сиёсий фаолияти давомида тинчлик ўрнатилиши учун бошқа номзодларга нисбатан кўпроқ иш қилган: хусусан, Исроил ва БАА ўртасидаги муносабатларнинг тикланишида унинг маъмурияти асосий ролни ўйнаган.

«Минтақадаги бошқа мамлакатлар ҳам Амирликлар йўлидан боради, бу келишув туфайли Яқин Шарқ ҳамкорлик ва фаровонлик минтақасига айланади», — деб таъкидлаган Тибринг-Гедде.

14 август куни Трампнинг миллий хавфсизлик бўйича маслаҳатчиси Роберт О'Брайен ҳам Америка президенти тинчлик бўйича Нобел мукофотини олиши мумкинлигини айтганди.

13 август куни Трамп Исроил ва БАА икки томонлама муносабатларни яхшилашга қаратилган тарихий келишувни имзолаганини маълум қилди. Икки мамлакат АҚШ президенти маъмурияти воситачилигида ўзаро ҳамкорлик қилишга келишиб олди.