Арманистонда 2021 йилнинг 11 январигача карантин жорий этилди

Ҳукумат қарорига мувофиқ, карантин муддати якунлангунига қадар мамлакатга қуруқлик орқали кириш тақиқланади.

Фото: facebook.com/armgovernment

Арманистон ҳукумати фавқулодда ҳолат режими муддати якунига етиши муносабати билан мамлакатда 2021 йилнинг 11 январигача карантин жорий этиш тўғрисида қарор қабул қилди. Бу ҳақда ҳукумат расмий сайтида хабар берилмоқда.

"Бутун дунёдаги эпидемик вазиятни ҳамда Арманистонда коронавирус инфекцияси тарқалаётганлигини ҳисобга олиб, Арманистон ҳукумати 11 сентябрдан 2021 йил 11 январгача бутун мамлакат ҳудудида карантин режимини жорий этишга қарор қилди", - дейилади хабарда.

Ҳукумат қарорига мувофиқ, карантин муддати якунлангунига қадар мамлакатга қуруқлик орқали кириш тақиқланади. Истисно тариқасида дипломатлар ва уларнинг оила аъзолари, аза маросимларига келаётганлар ҳамда халқаро юк ташувларини амалга ошираётган ҳайдовчиларга мамлакат ҳудудига киришга рухсат берилади.

Арманистонга кириб келган барча шахслар тиббий текширувдан ўтказилади ва касалланиш белгилари аниқланган ҳолларда шифохонага ётқизилади.

Охирги маълумотларга кўра, мамлакатда коронавирус юқтирганлар сони 45 503 кишига етган. Вирус республика аҳолисининг 1,4 фоизга яқин аҳолисида аниқланган.

#Арманистон

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.