«Қизил» ҳудуд деб топилган Фурқат туманида ҳам ҳоким ва сектор раҳбарлари узр сўради

6 октябръ куни Халқ депутатлари Фурқат тумани кенгашининг 13-сессияси бўлиб ўтди. Унда туманни 2020–2021 йилларда комплекс ижтимоий-иқтисодий ривожлантириш орқали «қизил ҳудуд»дан чиқариш чоралари ҳақида сўз борди.

Туман ҳокими – кенгаш раиси Дилмурод Солиев кун тартибидаги масала юзасидан ҳисобот берди ва туманни «қизил» ҳудуддан чиқариш бўйича ишлаб чиқилган «Йўл харитаси»ни тақдим этди.

Ҳокимнинг айтишича, туманда паст кўрсаткичлар қайд этилган 6та йўналиш – иқтисодий ривожланиш ва самарадорлик, меҳнат бозорининг самарадорлиги, иқтисодиёт рақобатбардошлиги диверсификацияси кўрсаткичлари, ишбилармонлик муҳити ва тадбиркорликни ривожлантириш, маҳаллий солиқларни йиғувчанлиги каби йўналишларда махсус чора-тадбирлар ишлаб чиқилган.

Дастур бўйича аниқ вазифалар белгилангани айтилди. Масалан, тумандаги 4та сектор ҳудудларида кичик саноат зоналарини ташкил этиш орқали 500дан зиёд янги иш ўринларини яратиш ва бу орқали маҳаллий бюджетга қўшимча тушум туширилиши режа қилинган.

Сессияда ҳоким Дилмурод Солиев бошчилигидаги сектор раҳбарлари узр сўради. Фурқат туманини «қизил ҳудуд» тоифасидан чиқарилиши учун барча имкониятлар сафарбар этилиши таъкидланди.

Сессияда Олий Мажлис Сенатининг Фан, таълим ва соғлиқни сақлаш масалалалари қўмитаси раиси ўринбосари М.Парпиев ҳамда Фарғона вилояти ҳокими ўринбосари М.Убайдуллаевлар сўзга чиқди. Якунда кўрилган масала юзасидан тегишли қарор қабул қилинди.