“Ходимларим солиқчининг уйига киришдан аввал эшикни тақиллатишган” – собиқ ИИБ бошлиғи Акмал Хўжаев кўрсатмаси тингланди

Кеча, 25 ноябр куни бўлган суд мажлисида Фурқат тумани собиқ ИИБ бошлиғи Акмал Хўжаев ҳамда унинг ўринбосари Жасур Расуловнинг кўрсатмалари тингланди.

“17 апрел куни (тадбир бўлган кун) Фарғона шаҳрида тадбирда эдим. Тадбирни тамомлаб, соат тахминан 15:00-16:00 лар чамасида Фурқат туманига қайтаётганимда йўлда телеграмимга қўнғироқ бўлиб, солиқ раҳбари хизмат уйига вояга етмаган мактаб ўқувчисини олиб кириб кетгани ҳақида хабар келиб тушди. Ўринбосарим Жасур Расуловга қўнғироқ қилиб, ҳолатдан уни хабарбор қилдим ва вазиятни ўрганишни буюрдим.

Шундан сўнг Жасур Расулов ходимларини олиб хизмат уйига кирибди. У ерда солиқ бошлиғи ва мактаб директорини қип-яланғоч ҳолатда кўришибди. Сўнг иккисини ИИБ биносига олиб киришибди. Вояга етмаган қиз ким экан деб сўрасам, 29-мактаб директори экан, дейишди. Ходимларим тезкор тадбир учун қилинган қарорларни ҳам кўрсатишди. Қўлларида қарори бор экан.

Солиқ бошлиғи Қурбонали Абдураҳмонов хизмат уйини фоҳишахонага айлантирворганди. Вояга етмаган қизни уйига олиб кириб кетяпти деган хабар келгани учун тезкор тадбирга рухсат берганман. Давлатимиз томонидан берилган хизмат уйларида прокурор, прокурор ёрдамчиси, солиқ бошлиғи ва мен яшардим (ушбу амалдорларга хизмат уйлари бир жойдан берилган – таҳр). Солиқ инспекцияси бошлиғи Қурбонали Абдураҳмоновни хизмат уйингга бегона аёлларни олиб кирмагин, деб кўп маротаба огоҳлантирган эдим.

Фурқат туманига етиб келиб, ИИБ биносига кириб, Гулираъно Қосимова ва Қурбонали Абдураҳмоновни кўрдим. Улар ёнимга кела олишмади. ИИБ биносида туриб вилоят Солиқ бошқармасига бўлган ҳолат ҳақида хабар бердим.

Ходимларим солиқчининг уйига киришдан аввал эшикни тақиллатишган экан. Ичкаридан хабар бўлмагач, ундан кейин киришган хизмат уйига. 2-қаватга чиқишса, иккиси жинсий алоқа қилаётган экан.

Орадан 3 кун ўтиб, ИИБга Қосимова ва унинг турмуш ўртоғи келди. Гулираънонинг турмуш ўртоғи аёли туфайли гап-сўз тарқагани, кўчада бош кўтариб юра олмаётгани, ўша кунги телефонга олинган кадрларни беришини сўради. Унга жавобан Гулираъно яхши аёл экани, англашилмовчилик бўлганини айтиб, турмуш ўртоғини юпатишга ҳаракат қилдим.

“Элтуз” ижтимоий тармоғида мен ҳақимда маълумотлар чиқди. Ҳамма айбни менга юклашди. Гулираъно ижтимоий тармоққа чиқиб, “ечинтириб уришди, 2-қаватга олиб чиқиб уришди” деяпти. Буларнинг барчаси туҳмат. Гулираъно ва Қурбоналига адоватим йўқ. Қурбоналига телевизор ёки тефал олиб бер демаганман.

Вилоят прокуратураси бирор бир кўрсатмаларимни инобатга олмади. Ҳамма ҳаракатларимиз, тезкор тадбир қонуний бўлган. Гулираъно Қосимовага кимдир ўргатяпти. Тадбир аввалдан режа қилинган дейишяпти. Бу ҳам туҳмат. Дори ичиб, ўз жонига қасд қилган дейишяпти. Бу ҳолат ҳам шубҳали”, деди ўз кўрсатмасида собиқ ИИБ бошлиғи Акмал Хўжаев.

Акмал Хўжаев кўрсатмасидан сўнг прокурор собиқ ИИБ бошлиғига кўрсатмаси юзасидан саволлар берди. Лекин Акмал Хўжаев бўлиб ўтган ҳолат бўйича барча кўрсатмаларни бериб бўлгани, прокурорнинг саволига жавоб бермаслигини билдирди ва ўз адвокатининг саволларига жавоб бериш билан кифояланди.

Шундан сўнг ИИБ бошлиғи ўринбосари Жасур Расуловнинг кўрсатмаси тингланди:

“Айбимга иқрор эмасман. 18 йилдан бери ИИБда ишлайман. Фурқат туманида шу йилнинг 26 мартидан иш фаолиятимни бошлаганман. Мен фақат Акмал Хўжаевнинг буйруғини бажарганман холос. Фурқат тумани прокуратурасида бизни бир томонлама сўроқ қилишган. Гулираъно Қосимова омма эътиборини ўзига жалб қилиш учун тез-тез ОАВда чиқиш қиляпти. Бизга нисбатан туҳматлар бўляпти.

17 апрел куни хизмат вазифасини бажариш учун кирганмиз. Гулираъно Қосимова ва Қурбонали Абдураҳмоновга нисбатан ғаразли ниятимиз бўлмаган. Аслида 5 апрел куни “солиқчи хизмат уйига енгилтабиат аёлларни олиб киряпти” деган хабар келиб тушган. Тезкор тадбир қилганимизнинг сабаби жиноятчиликнинг олдини олиш бўлган. Хизмат уйида вояга етмаган бизнинг ёки кимнингдир синглисининг номуси топталиши мумкин эди-ку.

17 апрел куни Акмал Хўжаев қўнғироқ қилиб солиқчининг хизмат уйида шундай ҳолат бўлаётган экан, текширинглар, деди. Ғайрат Отақуловга қўнғироқ қилдим. 3-4 дақиқа ичида тадбир қилиш учун қарор тайёрлаб берди, тасдиқлаб бердим.

Участка нозири эшик очиқ экан, деди. Ичкарига кирмасдан аввал чақирдик. Ҳеч ким жавоб бермади. Мен кўчада қолдим. Ходимлар ичкарига кириб кетишди. Кейин 2-қаватдан бақир-чақир овозлар эшитилди. 2-қаватга кўтарилсам, солиқчи ва мактаб директори яланғоч ҳолатда экан. Ходимлар аёлнинг юзини кўриб туриб шахсини аниқлашга ҳаракат қилишди. Кейин “участкавой” Аъзам аёл 29-мактабнинг директори эканини айтди. Аёлнинг вояга етганини билиб, кейин ходимларимга пастга тушаверинглар, дедим. Иккиси “участкавой” машинасига ўтириб ИИБ биносига боришди. Сўровхонада Гулираъно Қосимова билан гаплашдим. У солиқ бошлиғи кўп яхшилик қилганини айтиб, менга гап тегса тегсин, лекин солиқчига гап тегмасин, деб илтимос қилди.

Тадбир қилинишига дўкон сотувчиси Давлат Юсуповнинг 102 га қўнғироқ қилиб ҳолат бўйича хабар бергани асос эмас. Бунга биз аввалдан аниқлаган маълумотларимиз асос ҳисобланади. Вилоят прокуратураси томонидан кўрсатилган айбловлар асоссиз. Айбсизлигимни исботлаб бераман”, дея кўрсатма берди тезкор тадбирга бош бўлган Жасур Расулов.

Суд 28 ноябрга қадар танаффус эълон қилди.

Эслатиб ўтамиз, Kun.uz олдинроқ Фурқат туманида мактаб директори бўлган Гулираъно Қосимова билан содир бўлган ҳолат ҳақида суриштирув эълон қилганди. Унда Фурқат тумани ИИБ ходимлари аёлни калтаклаб, кийимларини йиртиб, яланғоч ҳолда тасвирга олгани ҳақида гап боради. Ҳолат Сенат қўмитаси томонидан назоратга олинган. Омбудсман Фурқат тумани ИИБнинг 4 нафар масъул ходими жиноий жавобгарликдан озод этилганини маълум қилиб, ҳолатга алоқадор бўлган ҳар бир шахснинг қилмиши тўлиқ ва холисона ўрганилишини сўраган.  

Аввалги суд мажлисида кўрсатма берган Фурқат туман солиқ инспекцияси собиқ бошлиғи, иш бўйича жабрланувчилардан бири бўлган Қурбонали Абдураҳмонов ўзи билан бир вақтда ишлаган туман ИИБ бошлиғи Акмал Хўжаев унга милиция ходимлари кунига 20 та телевизор олиб берасан деган топшириқ берганини, у рад этганидан сўнг ИИБ бошлиғи “ИИБга қарши чиқиш қандай бўлишини кўрсатиб қўйиш” билан таҳдид қилганини эслаганди.

22 октябр куни ўтган суд мажлисида эса гувоҳ тариқасида чақирилган ИИБ ходимлари Ғайрат Отақулов ва Юсуф Ёқубов судга келмагани боис судланувчилар Акмал Хўжаев (собиқ ИИБ бошлиғи) ва Жасур Расулов (ИИБ бошлиғининг собиқ ўринбосари) гувоҳлар эшитилмай туриб кўрсатма бермасликларини айтганди.

24 октябр куни Фурқат тумани ИИБ мансабдорлари устидан навбатдаги суд мажлисида жабрланувчи аёл ечинтирилгани айтилаётган “тезкор тадбир” иштирокчиси бўлмиш ИИБ тезкор ходими Юсуфбек Ёқубов сўроқ қилинган ва “давлат сири” деган важ билан судда ОАВ иштироки чеклаб қўйилганди.

7 ноябр кунги суд мажлисида судя жабрланувчи Гулираъно Қосимовани “иш юритиш тартибини бузгани учун” суд залидан чиқариб юборган эди.

Шундан сўнг Г.Қосимова ижтимоий тармоқ орқали видеомурожаат йўллаб, судя унга нисбатан адолатсизлик қилаётганини, ИИБ собиқ амалдорларига ён босаётганини айтди. Ушбу баёнот ортида 12 ноябрдан бошлаб суд мажлиси ОАВ иштироки учун очиб қўйилди.

21 ноябр куни бўлиб ўтган суд мажлисида эса Акмал Хўжаев ва унинг ўринбосари бўлган Жасур Расулов кўрсатмалари тингланиши керак эди. Ҳар икки собиқ ходим “видеоёзув бўйича экспертиза хулосаси чиқса танишиб, кейин кўрсатма бераман” дея кўрсатма беришдан яна бош тортганди.