Алиев Қорабоғда Арманистонга тегишли С-300 тизимлари йўқ қилинганини айтди

Алиевнинг сўзларига кўра, 200дан ортиқ танк, иккита С-300 тизими йўқ қилинган.

Фото: militaryarms.ru

Озарбойжон президенти Илҳом Алиев мамлакат қуролли кучлари Тоғли Қорабоғдаги жанглар давомида Арманистонга тегишли иккита С-300 тизимини йўқ қилганлигини айтди.

Унинг сўзларига кўра, "Арманистон қуролли кучлари оғир йўқотишга учраган".

"200дан ортиқ танк, иккита С-300 тизими йўқ қилинди, 33 танк ўлжа сифатида олинди", - деди Алиев.

Тоғли Қорабоғдаги қуролли тўқнашувлар 27 сентябрда бошланди. Ушбу ҳудуд борасида 30 йилдан буён баҳслашаётган Арманистон ва Озарбойжон тўқнашувлар бошланишида бир-бирини айбламоқда.

Орадан икки ҳафта ўтгач, 9 октябрь куни икки мамлакат ташқи ишлар вазирлари Москвада музокара ўтказди.

10 октябрь куни сулҳ тузилганлиги эълон қилинди, аммо томонлар бир-бирини ўт очишни тўхтатиш режимини бузишда айблаб келмоқда.