«Сув келди, 7 оила тарқалиб кетдик» – Сардоба тошқинини биринчи қабул қилган маҳаллада яшовчи Саидазим ота ҳикояси

– Ассалому алайкум ота, ёшингиз нечада, фарзандлардан нечта?

– Мен Саидазим Жуманов 77 ёшдаман. 9 фарзандим – 5 қизим, 4 ўғлим бор, ҳаммасини уйлаб-жойлаганман. Неваралар 25 нафар, 2 чеварам ҳам бор. Мана шу жойни боғ қилиб, қўйларни айлантириб юрибман.

– Сув омбори сизларга қанча масофада жойлашган? Умуман, ўша сув босган кунлари ҳақида ҳикоя қилиб берсангиз.

– Сардоба сув омбори уйимиздан 5 километр масофада жойлашган. 1 май куни эрталаб соат 4:30да шу хабар келди. Биз дарҳол қўни-қўшниларни ҳам уйғотиб, катта йўл сари кетдик. Шу куни соат 6:30да шу ерга 3 метр 20 сантиметр баландликда сув келган ва ҳамма жойни босиб кетган. Мен оилам билан Жиззах шаҳрига, фарзандларимдан кимдир Мирзачўлга, кимдир Зоминга, яна кимлардир боғчаларда вақтинча яшаш жойларига кетишди. 7 оила тарқалиб кетдик, хуллас. 23 май куни қайтдик.

– Одамларга зарар етмадими, жароҳатланганлар, ҳалок бўлганлар ҳақида нима дейсиз?

– Худога шукр, жароҳатланганлар ёки ўлим ҳолатлари бўлмади. Чорвамизга зарар етди, ўзимнинг 6 қўчқорим нобуд бўлди. Ҳарбийлар келиб ҳудудимизни тозалаб беришди. Бугун мана президентимиз келиб янги уйларни топширяпти, жуда миннатдормиз албатта.

Аброр Зоҳидов суҳбатлашди,
тасвирчи Нуриддин Нурсаидов.