ЕИ етакчилари Туркияни Кипр яқинида георазведка ишларини тўхтатишга чақирди

 ЕИ етакчилари икки кунлик саммит якунлари бўйича Туркияни Шарқий Ўрта Ер денгизида геологик разведка ишларидан воз кечишга чақирди. Бу ҳақда ЕИ давлатлари ва ҳукуматлари раҳбарларининг қўшма баёнотида айтилган.

"ЕИ кенгаши Туркияни ушбу фаолиятдан воз кечишга ва мунтазам ҳамда мустаҳкам асосда кескинликни юмшатиш устида иш олиб боришга чақиради", - дейилади баёнотда.

Охирги ойларда Анқаранинг Шарқий Ўрта Ер денгизида геологик разведка ишлари олиб боришни фаоллаштириши натижасида ушбу минтақада вазият кескинлашди.

Туркия Греция ва Кипр ўзларининг алоҳида иқтисодий ҳудуди деб ҳисоблайдиган сувларда геологик разведка ишларини олиб бормоқда. Бу Анқара ва ЕИ ўртасидаги қарама-қаршиликларга сабаб бўлмоқда.