«Янги уруш алангаси» – Судан сиёсий партиялари Исроил билан келишувни рад этмоқда

Судан сиёсий партиялари ҳукуматнинг Исроил билан муносабатларни нормаллаштириш тўғрисидаги қарорини рад этиб, расмийлар келишувига қарши мухолифат жабҳасини ташкил этишини айтган.

Жума куни Исроил, Судан ва Қўшма Штатларнинг икки мамлакат «ўз миллатлари ўртасидаги уруш ҳолатини тугатиш тўғрисида» келишиб олганликлари ҳақидаги қўшма баёнотидан сўнг суданликлар пойтахт Хартумда намойиш ўтказган.

Озодлик ва Ўзгаришлар кучлари (ФФC) сиёсий коалициясининг иккинчи энг кўзга кўринган таркибий қисми бўлган Судан Халқ Конгресс партиясининг баёнотида айтилишича, суданликлар нормализация келишувини қабул қилишга мажбур эмас.

«Мунтазам равишда изоляция қилинадиган ва махфий битимлардан четда қолаётган халқимиз нормаллашув келишувини имзолашга мажбур эмас», –дейилган баёнотда.

«Халқимиз ўзининг тарихий позицияларига риоя қилади ва нормализация ҳолатига қарши туриш учун кенг жабҳада фаолият олиб боради ва Фаластин давлати барча қонуний ҳуқуқларига эга бўлиши учун уларни қўллаб-қувватлайди».

Суданнинг собиқ бош вазири Содиқ ал-Маҳди ҳам бу хабарни қаттиқ танқид қилиб, шанба куни Хартумда ҳукумат томонидан уюштирилган диний конференциядан чиқиб кетганини маълум қилган.

Мамлакатнинг сўнгги демократик йўл билан сайланган бош вазири ва мамлакатнинг энг йирик сиёсий партиясини бошқарувчиси Ал-Маҳди шундай деди: «Ушбу баёнот Судан миллий қонунчилигига зид келади ва Яқин Шарқдаги тинчлик лойиҳасини йўқ қилишга ва янги уруш учун олов ёқишга ёрдамлашади».

Халқ  Конгресс партияси етакчиси Камол Омар алоҳида баёнотда айтишича, Суданнинг ўтиш даври ҳукумати ҳаққоний сайланмаган ва шу сабабли Исроил билан муносабатларни нормаллаштириш ваколатига эга эмас.

“Ушбу ўтиш давридан жорий ҳукумат минтақавий ва халқаро разведка идораларининг «ишончини оқлаш» учун Суданнинг позициясини ўзгартирди”, – деган у.