Трампнинг маслаҳатчиси билмасдан Россия агентига интервью бергани учун узр сўради

АҚШ президенти Дональд Трампнинг коронавирусга қарши кураш бўйича маслаҳатчиси Скотт Атлас Россиянинг РТ (Russian Today America) телеканалига берган интервьюси учун узр сўради.

Атласнинг сўзларига кўра, у РТ АҚШда хорижий агент сифатида рўйхатга олинганини билмаган. «Мен интервью берганимдан афсусдаман ва қилган ишим учун узр сўрайман», – деб ёзган Скотт Атлас ўзининг твиттерида.

Шунингдек, у биринчи навбатда АҚШ миллий хавфсизлигининг ҳимояси учун чин дилдан ишлаётган инсонлардан узр сўрашини таъкидлаган.

Эслатиб ўтамиз, 2017 йилда АҚШ Сенатининг қуролли кучлар бўйича қўмитаси Россияга тегишли контентларнинг бир қисмини трансляциясини тақиқлашни таклиф қилган эди. Ўша йили РТнинг бош муҳаррири РТ Америcа АҚШда хорижий агент сифатида қайта рўйхатга олинганини хабар берган.

Russian Today – Россия ҳукумати томонидан молиялаштирилувчи, бир неча хорижий тилларда фаолият юритувчи ахборот телеканали. Унга 2005 йилда асос солинган, АҚШда 2010 йилдан буён фаолият юритади.