Бразилия президентининг ўғли коррупцияда айбланмоқда

Рио-де-Жанейро прокуратураси мамлакат президенти Жаир Болсонарунинг тўнғич ўғли, сенатор Флавиу Болсонаруни депутатлик вақтида коррупцияга йўл қўйганликда айбламоқда. Бу ҳақда прокуратура сайтида маълум қилинди.

Қайд этилишича, президентнинг ўғлидан ташқари, унинг собиқ ёрдамчиси Фабрисиу Кейрошга нисбатан ҳам айблов эълон қилинган. Тахмин қилинишича, сиёсатчининг аппарати ходимлари маошларининг бир қисми у орқали кичик Болсонаруга берилган.

Прокуратуранинг фикрича, жиноий схемада камида 15 киши иштирок этган. Уларнинг барчаси жиноий тузилма ташкил этиш ва унда қатнашиш, ноқонуний пул ювиш ва ноқонуний бойлик орттиришда айбланмоқда. 

Бразилия федерал полицияси 2018 йил ноябрда "Рио-де-Жанейро штати қонунчилик йиғилиши депутатлари иштирокида коррупцион схема тузиш, пул ювиш, ходимларни тайинлашда товламачилик қилиш ишини тергов қилиш" доирасида операция ўтказганди.

Кейрош 2020 йил июнда ҳибсга олинганди. Молиявий назорат органлари унинг ҳисоб рақамидан 1,2 млн реал (210 минг доллар) ўтказилганлигини шубҳали деб ҳисобламоқда.