Швейцарияда коронавирусга қарши курашга ҳарбийлар жалб қилинади

“Пандемиянинг иккинчи тўлқини сабабли касалланиш ҳолатлари сони кескин ўсмоқда. Шифохонада, жумладан интенсив даволаш бўлимларида беморлар сони кўпайди. Бир қатор кантонлар раҳбарияти армия томонидан ёрдам берилишини сўради. Бу вазиятда Федерал кенгаш 2,5 минггача ҳарбийни сафарбар қилиб, аҳоли соғлиғини сақлаш секторини қўллаб-қувватлашга қарор қилди” , дейилган ҳукумат хабарида.  

Ушбу қарор 2021 йил 31 мартигача амал қилади. Ҳарбийлар шифохоналарга ва соғлиқни сақлаш идораларига ёрдам кўрсатади. Гап, жумладан, ҳарбийлар томонидан санитар автомобиллар тақдим этилиши ҳақида бормоқда.

Швейцарияда сўнгги суткада коронавирусга чалинганлар сони 10 мингдан кўпроққа ошди. Бу мамлакатда пандемия вақтида қайд қилинган энг юқори кўрсаткичдир. Жами касалланганлар сони 191 мингдан кўпроқни ташкил қилмоқда.    

Швейцария пандемиянинг иккинчи тўлқинини бошдан ўтказмоқда. Март ойи ва апрель бошида мамлакатда ҳар куни мингдан кўпроқ касалланиш ҳолати қайд қилиб келинганди. Сўнгра касалланиш ҳолатлари сони кескин камайиб, кунига ўртача 20тани ташкил қилган. Бироқ июнь охиридан инфекция тарқалиши суръатлари яна оша бошлаган. Мамлакатда 7 октябрда кунлик касалланиш ҳолатлари мингдан ошган, 16 октябрда 3 мингни, 21 октябрда 5 мингни, 29 октябрда 9 мингни ва 4 ноябрда 10 мингни ташкил қилган. 

Экспертлар касалланиш ҳолатларининг кескин кўпайишига карантин чораларининг юмшатилишини сабаб қилиб кўрсатишмоқда.