Австрия коронавирус сабабли локдаун эълон қилди

17 ноябрдан бошлаб Австрияда қисман комендантлик соати жорий этилади. Аҳоли уйидан фақат ишга, дўконга, спорт билан шуғулланиш ёки муҳтожларга ёрдам бериш учун чиқиши мумкин. Ушбу режим 6 декабргача амал қилади.

Фото: Eibner Europa / imago images / ТАСС

Австрия канцлери Себастян Курц мамлакатда кескин чеклов чоралари жорий этилишини маълум қилди. Бу ҳақда Associated Press хабар бермоқда.

17 ноябрдан бошлаб Австрияда қисман комендантлик соати киритилади. Аҳоли уйидан фақат ишга, дўконга, спорт билан шуғулланиш ёки муҳтожларга ёрдам бериш учун чиқиши мумкин. Ушбу режим 6 декабргача амал қилади. Фақат биринчи зарурат моллари билан савдо қиладиган дўконларгина ишлайди.

Кўнгилочар масканлар ва ресторанлар икки ҳафтадан буён ёпиқ, энди улар қаторига кутубхоналар, сартарошхона ва спорт заллари ҳам қўшилади. Мактаблар онлайн-режимга ўтади.

Курцнинг сўзларига кўра, Австрияда охирги ҳафтада 100 минг кишига 550та янги ҳолат тўғри келган – бу ҳукумат ҳисоблаган меъёрдан 11 баравар кўп.

Австрия соғлиқни сақлаш вазирлиги фақат қатъий локдаун шифохоналар тизимини инқироздан сақлаб қолиши мумкинлигини қайд этган.

#Австрия #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.