Австриянинг иккинчи йирик шаҳри коммунистларга овоз берди

Австриянинг иккинчи йирик шаҳри — Грацда бўлиб ўтган шаҳар кенгаши сайловида Коммунистик партия (KPÖ) энг кўп овоз тўплади. Партия кетма-кет иккинчи марта ғалаба қозониб, сайловчилар қўллаб-қувватловини янада оширишга муваффақ бўлди.

Фото: Erwin Scheriau/APA/dpa/picture alliance

28 июн куни бўлиб ўтган сайловнинг якуний натижаларига кўра, Австрия Коммунистик партияси 35,63 фоиз овоз тўплади. Бу унга шаҳар кенгашидаги 48 ўриндан 18 тасини эгаллаш имконини беради.

Бу коммунистларнинг Грацдаги кетма-кет иккинчи ғалабаси ҳисобланади. Партия 2021 йилда ҳам кутилмаган тарзда сайловда биринчи ўринни эгаллаган эди. Ўшанда KPÖ 28,84 фоиз овоз олган бўлса, бу сафар унинг қўллаб-қувватловчилари янада кўпайди.

Сиёсий таҳлилчиларнинг таъкидлашича, «Грац бошқача овоз беради» деган ибора бу гал ҳам ўз тасдиғини топди. Чунки коммунистлар мамлакатнинг иккинчи йирик шаҳрида машҳур бўлса-да, улар 60 йилдан зиёд вақтдан бери Австрия парламентига кириш учун зарур овоз тўплай олмаган.

Кузатувчилар партиянинг муваффақиятини биринчи навбатда уй-жой сиёсати билан боғламоқда.

2021 йилдан буён Грац бургомистри лавозимида ишлаб келаётган Элке Кар шаҳарда уй-жой қурилиши ва аҳолини турар жой билан таъминлаш масалалари бўйича фаолияти билан танилган.

Таҳлилчилар фикрича, маҳаллий коммунистлар айнан шу йўналишга урғу бериб, рақибларига қарши кескин популистик баёнотларсиз иш олиб боргани сайловчилар ишончини қозонишга ёрдам берган.

Партия ўз дастурида ижтимоий адолат, капитализм танқиди ва анъанавий сўл ғояларни сақлаб қолган бўлса-да, Элке Кар бу мавзуларда эҳтиёткор сиёсий услубни танлаган.

Шу билан бирга, оммавий ахборот воситалари қайд этишича, Кар аввалроқ Европа Иттифоқининг Россияга қарши жорий этган санкцияларини танқид қилган. У Россиянинг Украинага қарши ҳужумини қоралаган бўлса-да, иқтисодий чекловлар самарасиз эканини ва улар асосан аҳоли зиммасига оғирлик солаётганини айтган.

Сайловда иккинчи ўринни Австрия Халқ партияси эгаллаб, 25,35 фоиз овоз олди. «Яшиллар» 14,84 фоиз билан учинчи ўринни банд қилди.

Бутун мамлакат миқёсида оммабоп бўлган ўнг популистик Австрия Озодлик партияси эса Грацда атиги 12,2 фоиз овоз тўплаб, тўртинчи ўринда қолди.

Бу натижа мамлакатдаги умумий сиёсий манзарадан фарқ қилади. Чунки 2024 йилги парламент сайловларида айнан Австрия Озодлик партияси биринчи ўринни эгаллаган, коммунистлар эса парламентга ўтиш учун етарли овоз тўплай олмаган эди.

Бироқ парламент сайловидан кейинги узоқ музокаралар натижасида ўнг популистлар ҳукумат туза олмади. Социал-демократлар, либераллар ва консерваторлар уч партияли коалиция тузишга келишиб олди ва мамлакат канцлери этиб Австрия Халқ партияси вакили Кристиан Штокер тайинланган.