Геология соҳасидаги ишларнинг бориши кўриб чиқилди

«Охирги уч йилда ушбу соҳага катта маблағ ажратилиб, технологияларни янгилаш, илм-фанни тиклаш ва кадрлар тайёрлаш бўйича кенг қамровли ишлар олиб борилмоқда. Замонавий техникалар қўлланаётгани натижасида бурғилаш аниқлиги ва унумдорлиги ошди. Ерости бойликларнинг захираси ҳам, прогноз ресурслари ҳам кўпайди», дейилади президент матбуот хизмати хабарида.

Йиғилишда бу борадаги ишларни изчил давом эттириб, соҳанинг инвестициявий жозибадорлигини ошириш, давлат корхоналарини ислоҳ қилиш бўйича кейинги даврдаги асосий вазифалар муҳокама қилинди.

Давлат раҳбари геология-қидирув ишларини ошириш ҳисобига 2021-2022 йилларда минерал хомашё базасини кескин кенгайтириш зарурлигини таъкидлади.

Соҳага хорижий инвесторларни жалб қилиш учун геология-қидирув ишларини ташкил этишга бўлган ёндашувни ҳам ўзгартириш кераклиги қайд этилиб, шу мақсадда истиқболли майдонларни шакллантириш, уларни хорижий инвесторларга бериш, геологик қидирув ўтказиш ва солиққа тортиш тизимларини халқаро тажриба асосида такомиллаштириш бўйича топшириқлар берилди.

31та стратегик фойдали қазилма майдон ва конлар жойлаштирилган онлайн аукционга чет эллик сармоядорларни кенг жалб этиш муҳимлиги айтиб ўтилди.

«Геология соҳасида 50 фоиз вақт инвестиция билан шуғулланишга сарфланиши керак. Инвестиция келмаса, геологияда вазият ўзгармайди. Узоқ йиллик мавҳум режалар эмас, қисқа муддатли, аниқ ва натижадор режалар керак», – деди Шавкат Мирзиёев.

Етакчи аудиторлик ва консалтинг компаниялари билан ҳамкорликда соҳадаги давлат корхоналарини трансформация қилиш бўйича «йўл хариталари» ишлаб чиқиш вазифаси қўйилди.

Соҳа учун малакали кадрлар тайёрлаш, илм-фанни ривожлантириш масалаларига алоҳида эътибор қаратилди. «ЎзгеорангметЛИТИ» институтига илғор тажрибага эга хорижий компания жалб қилиниши белгиланди. 

Йиғилишда мутасаддилар 2021-2022 йилларда амалга ошириладиган чора-тадбирлар юзасидан ахборот берди.