Француз радиосида хатолик туфайли қиролича Елизавета ІІ ва Пеле “ўлганга чиқарилди”

Франциянинг RFI радиостанцияси сайтида хатолик туфайли ҳозирда ҳаёт бўлган 100га яқин таниқли шахслар, жумладан Британия қироличаси Елизавета ІІ ва футбол “қироли” Пеленинг “вафоти муносабати” билан таъзияномалар жойлаштирди.

Елизавета ІІ / Фото: Zuma / TASS

Таъзияномалар радиостанция сайтида 16 ноябрда жойлаштирган. Бир неча соатдан кейин улар ўчириб ташланган ва радиостанция ушбу “техник хато” учун барчадан узр сўраган.

Радиостанцияда “ўлганга чиқарилган” таниқли шахслар орасида Британия қироличаси Елизавета ІІ, футбол “қироли” Пеле, актрисалар Брижит Бардо ва Софи Лорен, актёрлар Ален Делон, Клинт Иствуд ва Жан-Пол Бельмондо, АҚШнинг собиқ президенти Жимми Картер, рассом Йоко Оно ва модельер Пьер Карден бўлган.

“Бирлашган қироллик бугун эрталаб етимланиб қолди. Букингем саройи қиролича Елизавета ІІ’нинг вафот этганини расман эълон қилди. ... санада вафот этган қиролича 2020 йил 21 апрелда 94 ёшга тўлган бўларди”, деб айтилган қиролича некрологида.

Радиостанция қиролича коронавирусдан вафот этган ҳолатда некрологни “Бутун дунёда алғов-далғовлик олиб келган коронавирус пандемияси монархларга ҳам шафқат қилмаяпти”, деган сўзлар билан бошлашни тавсия қилган.

Радиостанция сайтида умумий ҳисобда 100га яқин ҳаёт бўлган инсонларга некрологлар жойлаштирилган.

“Биз бу ҳодисага тааллуқли бўлганлардан ҳам, ўз кузатувчиларимиздан ҳам узр сўраймиз. Хатоимизни тузатиш учун барча ишни қиламиз”, деб ёзган радиостанция твиттерда.

Таъкидланишича, таъзияномаларнинг олдиндан тайёрлаб қўйилиши кўплаб хорижий ОАВлар учун одатий амалиёт ҳисобланади. RFI’да изоҳ берилишича, хатолик таҳририятнинг янги тизимга ўтиши вақтида юз берган.