АШнинг Фуқаро авиацияси федерал бошқармаси (Federal Aviation Administration, FAA) Boeing компаниясига можароли Boeing 737 Max самолётларини эксплуатацияга қайтаришга рухсат берди.
Ушбу турдаги самолётлар иштирокида ярим йил ичида иккита авиаҳалокат юз бергандан кейин 2019 йил март ойида улардан бутун дунёда фойдаланиш тўхтатилганди. 2018 йил октябрда Индонезиянинг Lion Air авиакомпаниясига тегишли 737 Max ҳалокатида 189 киши, 2019 йил мартда Ethiopian Airlines’нинг ушбу турдаги самолёти қулаши оқибатида 157 киши ҳалок бўлганди.
Шундан кейин FAA Boeing’дан ҳалокатларга сабаб бўлган муаммони ҳал қилиш учун 737 Max дастурий таъминоти ва қурилмаларига тегишли ўзгартиришларни киритишни ҳамда самолётни текшириш вақтида аниқланган бошқа нуқсонларни бартараф этишни талаб қилганди.
FAA ушбу турдаги самолётлардан фойдаланишга рухсат бергандан кейин бутун дунё авиакомпаниялари уларда парвозларни бажаришни қайта йўлга қўйиши мумкин.
Бироқ экспертларнинг таъкидлашича, 737 Max самолётлари фойдаланишга секин-аста қайтарилади ва яқин ойларда улар осмонга кўтарилмайди. Boeing учувчиларни қўшимча ўқитишдан ташқари, узоқ вақт парвозсиз турган самолётларидаги нуқсонларни бартараф этиши ва уларни фойдаланишга тайёрлаши лозим бўлади.
АҚШ авиакомпаниялари ичида фақатгина битта American Airlines яқин орадаги парвозлари жадвалига 737 Max’даги рейсларни киритган. Бундай биринчи рейс 29 декабрда Майами-Нью-Йорк йўналиши бўйича амалга оширилади. АҚШнинг қолган авиакомпаниялари эса самолётларни 2021 йил 1-чорагида фойдаланишга киритишни режалаштирмоқда.
АҚШ авиакомпаниялари паркида жами 72та, қолган давлатлар авиакомпанияларида эса 315та 737 Max бор. Boeing томонидан ушбу турдаги самолётлардан яна 450 дона ишлаб чиқарилган, бироқ улар мижозларга етказилмаган.
