Жаҳон банки коронавирусга қарши вакцина ва дориларга 12 миллиард доллар ажратди

Жаҳон банки коронавирусга қарши вакцина, тест ҳамда дори-дармон сотиб олиш ва 112та давлат аҳолиси ўртасида тақсимлаш учун 12 млрд доллар ажратди ва яна 4 млрд доллар ажратмоқчи. Бу ҳақда банкнинг президенти Дэвид Мэлпас “Катта йигирматалик”ка кирувчи давлатлар молия вазирлари ва марказий банклари раҳбарлари билан учрашувда маълум қилди.

Фото: AP Photos/Susan Walsh

Ажратилган маблағ Жаҳон банки 2021 йил 30 июнгача пандемия оқибатларига қарши курашга йўналтиришни режалаштирган 160 млрд долларлик пакетнинг бир қисми ҳисобланади.

“Бизда 112та давлатда соғлиқни сақлаш соҳасидаги фавқулодда вазиятга жавоб бериш дастури бор ва биз вакциналар сотиб олиш ҳамда уларни етказиш учун яна 12 млрд доллар ажратишга имкон берувчи тезкор механизмдан фойдаланмоқдамиз”, деб айтган Мэлпас.

Унинг таъкидлашича, молиявий ёрдам халқаро текширувдан ўтган ва АҚШ, Япония ёки Европа иттифоқида тасдиқланган вакцинани сотиб олиш учун давлатларга грант ёки кредитлар тақдим қилишни ўз ичига олади.

Тайёрлаган Шуҳрат Раҳимов

#вакцина #Жаҳон банки

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.