Россияда авиафалокатдан кейин Ан-124 “Руслан” юк самолётлари парвозлари тўхтатилди

Россиянинг ўта оғир юкларни ташишга ихтисослашган “Волга-Днепр” авиакомпанияси Новосибирскда Ан-124 “Руслан” самолёти билан кўнгилсиз ҳодиса юз бергандан кейин ушбу самолётлар эксплуатациясини тўхтатиб туришга қарор қилди.

Фото: ТАСС

“Бу пухта ўйланган қарордир. Биз хавфсизликни биринчи ўринга қўядиган масъулиятли авиакомпания эканимизни намойиш қилмоқчимиз”, деб изоҳ берган ушбу қарорга компаниянинг тижорий директори Константин Векшин.

Ҳозирда авиакомпанияда яқинда юз берган ҳодисанинг мустақил тергови бошланган. Шунингдек, компания буюртмачилар билан рейсларни қайта расмийлаштириш бўйича музокаралар олиб бормоқда. Имкони бор жойда юклар Boeing-747 самолётларига ўтказилади.

Компания Ан-124 транспорт самолётларининг дунёдаги энг йирик фойдаланувчиси ҳисобланади. Авариягача компания паркида ушбу самолётдан 12 дона бўлган.

Векшин компаниянинг собиқ ҳамкори, эндиликда эса рақобатчисига айланган Украинанинг “Авиалинии Антонова” компаниясига бошқа буюртмачиларга кўмак кўрсатиши мумкинлигини, бироқ вужудга келган вазиятда у ҳам “Волга-Днепр” каби йўл тутиши мақсадга мувофиқ бўлишини айтган.

“Ушбу вазиятда “Авиалинии Антонова” ҳам биздан ўрнак олиши керак, бироқ бу уларнинг шахсий иши”, деб айтган компания вакили.

Самолётларнинг парвозлари қачон тикланиши бўйича маълумотлар келтирилмаган.

13 ноябрда Новосибирскда Ан-124 самолёти Толмачево аэропортига фавқулодда қўнишни амалга оширган. Самолёт қўниш вақтида учиш-қўниш йўлагидан ташқарига чиқиб кетган ва жиддий зарарланган. Кейинроқ самолётнинг двигателларидан бири парвоз вақтида ишламай қолгани маълум бўлган.

Ан-124 Собиқ иттифоқ томонидан ишлаб чиқилган узоқ масофаларга мўлжалланган транспорт самолёти бўлиб, Ан-225 “Мрия” моделидан кейин дунёда иккинчи рақамли энг оғир юк кўтарувчи самолёт ҳисобланади.