Францияда талаффуздаги акцент учун камситишга жиноий жавобгарлик белгиланди 

Франция парламентининг қуйи палатаси инсоннинг акценти бўйича таҳқирлашни “ирқчилик шаклларидан бири” деб топиб, уни тақиқлаб қўйган. Бу ҳақда The Local нашри хабар берди. 

Қонун лойиҳаси учун 98 депутат овоз берган, 3 депутат қарши чиққан. Глотофобия каби маълум бўлган акцент бўйича камситиш ирқчилик, жинс бўйича ва ногиронликка эга одамларни таҳқирлаш билан бир қаторда суд таъқибига учрайдиган таҳқирлаш сабаблари рўйхатига киритилди.

Ушбу ҳаракатлар учун максимал жазо 3 йилга озодликдан маҳрум этиш ва 45 минг евро жаримани ташкил қилади.

Депутат Кристоф Эйзе томонидан таклиф этилган қонун унга берилган овозлар кўплигига қарамай, қизғин муҳокамаларга сабаб бўлган. Жумладан, шимолий африкалик муҳожирлар қизи бўлган депутат Патрисия Мираллес ўсмирлик вақтида жазоирча акценти учун камситишларга учраганини айтган.

Франция адлия вазири Эрик Дюпон-Моретти янги қонун зарурлигига ишончи комиллигини таъкидлаб ўтган.

Октябрда “Бўйсунмас Франция” ҳаракати етакчиси Жан-Люк Меланшон унга парламентда савол берган жанубий акцентга эга журналистга нисбатан қўполлик қилган.

“Менга кимдир французчада савол бера оладими? Ва буни тушунарлироқ қила оладими?” деб айтган ўшанда Меланшон журналистларга юзланиб.