Қозоғистон Россиянинг коронавирусга қарши вакцинасини ишлаб чиқариш учун майдон излашни бошлади

Қайд этилишича, вакцина ишлаб чиқариш фаолият кўрсатаётган фармацевтика заводларида амалга оширилади.

Фото: Natalia Kolesnikova/AFP/Getty Images

Қозоғистонда Россиянинг коронавирусга қарши вакцинасини ишлаб чиқариш учун майдон изланмоқда, деди мамлакат соғлиқни сақлаш вазири Алексей Цой.

"Ҳозирда бу масала кўриб чиқилмоқда, биз майдонни аниқламоқдамиз. Ишлаб чиқариш фаолият кўрсатаётган фармацевтика заводларида амалга оширилади. Россиялик ҳамкасбларимиз билан мамлакатимизда вакцина ишлаб чиқариш имкониятини ўрганмоқдамиз", - деди Цой.

"Вакцина синовлари учинчи босқичда, россиялик ҳамкасбларимиз тез вақт ичида тадқиқот натижаларидан хабардор қилишларини айтишди. Биринчи ва иккинчи босқичларда самарадорлик қайд этилди, шу боис уни потенциал вакциналардан бири сифатида кўрмоқдамиз", - деб қўшиб қўйди у.

Аввалроқ Қозоғистон президенти Қосим-Жўмарт Тўқаев Россия президенти Владимир Путин билан Россиянинг коронавирусга қарши вакцинаси ишлаб чиқариладиган завод қурилиши тўғрисида келишувга эришганини маълум қилганди.

Тайёрлаган Дилшод Аскаров

#Қозоғистон #вакцина

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.