Дунёда пандемия бошидан бери рекорд даражада кунлик касалланиш қайд этилди

Сўнгги суткада дунёда коронавирусга чалинганлар сони 747 минг нафарга кўпайди. ЖССТнинг хабар беришича, айни вақтда жами касалланиш ҳолатлари сони 61,2 млндан ошди.

Фото: Reuters

Бу орада Жон Ҳопкинс университетининг маълум қилишича, касалланганлар сони 62,5 млндан ошди, ўлимлар сони эса 1,145 млндан кўпроқни ташкил қилмоқда.

ЖССТ маълумотларига кўра, охирги касалланиш ҳолатларининг ярмидан кўпроғи Шимолий ва Жанубий Америка минтақасига тўғри келган – 405 минг 399та. Бу борада 2-ўринни Европа иттифоқи (236 минг 50та), 3-ўринни Жануби-Шарқий Осиё (53 минг 82та) эгаллаган.

Аввалроқ ЖССТ вакиллари Европанинг баъзи давлатларида Рождество ва Янги йил байрамлари арафасида карантин чекловлари юмшатилиши борасида хавотир билдиришганди. Мутахассислар коронавирус тарқалишини чекловлар ушлаб турганини эслатиб ўтишган. “Ҳозир саъй-ҳаракатлар ва ҳушёрликни сусайтириш мавриди эмас”, деб айтган ЖССТ мутахассиси Мария Ван Керкхове.

Тайёрлаган Шуҳрат Раҳимов

#ЖССТ #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.