ПФЛ Фарғонадаги жанжалли ўйин бўйича баёнот берди. Ҳакам можароли вазиятда тўғри қарор чиқарган

Баёнотда мухлислар ва «Нефтчи» футболчилари томонидан калтакланган ҳакамларнинг ҳолати бўйича маълумот берилган: уларнинг саломатлиги яхши. ПФЛ ҳакамларнинг ўйинда тортишувларни юзага келтирган учта қарорини алоҳида таҳлил қилиб, барча қарорлар тўғри бўлганини маълум қилди. Ҳакамлар ўйинни бошқаргани учун 8,3 балл (яхши) олган.

«Нефтчи» – «Турон» учрашуви кутилганидек шиддатли кечди ва унда меҳмонлар 1:0 ҳисобида ғолиб чиқиб, Суперлига йўлланмасини қўлга киритди. Баҳс якунида ҳакамларга нисбатан «Нефтчи» футбол клуби футболчилари ҳамда мухлисларининг тажовузкор хатти-ҳаракатлари кузатилди, майдонда тартибсизлик вужудга келди. Ички ишлар органлари ходимларининг саъй-ҳаракатлари сабаб кўнгилсиз ҳолат тезда бартараф этилди.

Шу куни беллашувни томоша қилиш учун Фарғона вилояти ҳокими Хайрулла Бозоров, шунингдек, вилоятнинг бир қатор мансабдор шахслари «Истиқлол» стадионига ташриф буюрганди. Кўнгилсиз воқеанинг тезликда бартараф этилишида уларнинг ҳиссаси катта бўлди. Беллашув якунида вилоят ҳокими «Турон» футболчиларини тақдирлаш учун майдонга чиқди.

Бунга қадар тез тиббий ёрдам ходимлари учрашув ҳакамларига ёрдам кўрсатди ҳамда уларнинг ҳолатларини текширувдан ўтказди. Шу куни ҳакамлар бригадаси ва учрашувда бевосита иштирок этган шахсларнинг оғир тан жароҳати олиши ҳолати кузатилмади. Бугун, 2 декабр куни учрашув расмийлари ЎзПФЛ вакиллари билан биргаликда Тошкентга қайтиб келди, айни вақтда уларнинг саломатликлари билан боғлиқ муаммо йўқ.

ЎФА Ҳакамлар ва назоратчилар бўлими экспертлари учрашувни ўрганиб чиқди. Унинг бурилиш нуқталари асосан уч вазиятда юз берган:

– 14-дақиқада бош ҳакам мезбонлар дарвозасига пенальти белгилади. Ҳакам вазиятга яқин бўлгани учун ҳақли равишда 11 метрлик жарима зарбаси белгилади;

– 45-дақиқада тўп «Турон» футболчисининг қўлига теккандек туюлди. Ўрганишлар шуни кўрсатдики, ҳакам жарима белгиламай тўғри қарор қабул қилган. Сабаби тўп футболчининг тана қисмига теккан;

– 90-дақиқада тўп яна бир бор «Турон» футболчисининг қўлига теккандек туюлди. Такрорий лавҳа эса тўп футболчининг кўкрак ва елка қисмига текканини кўрсатди. Қолаверса, бу ерда ҳимоячининг қўли табиий ҳолатда турганди. Ҳакамнинг бу қарори ҳам тўғри бўлди.

Шундан келиб чиқиб, учрашувни яхши бошқариб борган ҳакам 8,3 баллга лойиқ кўрилди, унинг ҳаракатлари яхши баҳоланди. ЎзПФЛ беллашувдаги провакацион ҳаракатларга учмай, мураккаб ўйинни борича бошқариб борган ҳакамлар бригадасига ўз миннатдорлигини билдиради. Шунингдек, бугун ЎзПФЛ мазкур ишни тегишли қўмиталарда ўрганиб чиқиш ҳамда айбдорларни жазолашни сўраб, ишни ЎФАга оширди.

Кечаги куннинг ўзида ЎзПФЛ расмийлари Фарғона вилояти ИИББ вакиллари билан мулоқотда бўлди ҳамда қонунчилик асосида уларни қизиқтирган барча саволларга жавоб қайтарди. Ўйиндан кейин ўзини нопрофессионалларча тутган мезбонлар вакиллари ва бунинг оқибатида тақиқланган ҳудудни кесиб ўтган футбол мухлислари билан вилоят ИИББ шуғулланмоқда. Айни вақтда ЎФА тегишли қўмитасида ҳам, ИИББда ҳам ишни ўрганиш учун етарлича далиллар мавжуд», – дейилади баёнотда.

Маълумот учун, Суперлига йўлланмаси учун ҳал қилувчи ўйин бўлган «Нефтчи» – «Турон» учрашувидан кейин «Нефтчи» футбочилари ва мухлислари бош ҳакам Шавкат Насибуллаевга ташланиб кетишди. «Нефтчи» футболчиси Жамшид Тўрақулов бутсасининг таг қисми билан ҳакамни тепиб, майдонга қулатган ва айнан шу ҳаракатдан кейин жанжал авж олган. Бироқ бу футболчига ҳеч қандай чора кўрилмаган ва у ўйиндан кейин жамоа билан бирга кетган. Ўйиндан кейин 5 киши 15 суткага қамалган. 6 кишига нисбатан жиноят иши очилган.

Ўйин якунига кўра Яйпаннинг «Турон» клуби Про-Лига чемпиони сифатида Ўзбекистон юқори дивизиони – Суперлигага йўлланма олди. «Нефтчи»да эса ҳамон юқори дивизионга чиқиш учун имконият бор. Бу учун жамоа Суперлиганинг 13-ўринни олган жамоасини ўтиш ўйинида мағлуб этиши керак.