Солиқчилар тадбиркордан 6 млрд сўмни ноқонуний ундирмоқчи бўлди. Улар судда ютқазгач, апелляция берди ва яна ютқазди

Kun.uz шу йил август ойида, Навоий шаҳар давлат солиқ инспекцияси «Zarafshan Golden Group» МЧЖдан 6 млрд сўм пулни ноқонуний ундиришга урингани ҳақида хабар берган эди.

Солиқ инспекцияси томонидан нотўғри текширув ўтказилиши ва ҳисоб рақами ёпиб қўйилиши оқибатида МЧЖ фаолиятида узилиш юзага келган, ишчилар ойлик маошини бериш кечиккан.

Бундан норози бўлган тадбиркор солиқ инспекциясини судга берди. Ишни кўриб чиққан Навоий шаҳар маъмурий суди ишни тадбиркор фойдасига ҳал қилди. Бу ҳақда Kun.uz мухбири хабар бермоқда.

Суд ҳужжатларига кўра, «Zarafshon Golden Group» МЧЖ томонидан 2019 йил январ–декабр ойлари учун тақдим этилган қўшимча солиқ ҳисоботларида Навоий шаҳар ДСИ томонидан тавофутлар аниқланиб, қўшимча солиқ ҳисобланган ҳолатда МЧЖ томонидан солиқ ҳисоботига тузатишлар киритиш лозимлиги сўралган.

Мазкур ҳолатда жамият томонидан 2020 йил 12 май куни солиқ ҳисоботларига ўзгартиришлар киритилиб, аниқлаштирилган солиқ ҳисоботи дастурий таъминот орқали ДСИга юборилган. Бироқ мазкур аниқлаштирилган ҳисоботлар номаълум сабабларга кўра қабул қилинмаган ҳамда «Zarafshon Golden Group» МЧЖ банк ҳисоб рақамига шу куннинг ўзида 4 211 473 028 сўм миқдоридаги ҚҚС ундириш бўйича инкасса тўлов топшириқномаси қўйилган.

«Zarafshon Golden Group» МЧЖ тақдим этган аниқлаштирилган солиқ ҳисоботи бўйича тушунтириш бериш якунланмасдан туриб, жамият ҳисоб рақамига қўшимча равишда ДСИ томонидан 2 496 830 731 сўм миқдорида ҳисобланган ҚҚС ундириш бўйича инкасса тўлов топшириқномаси ҳам юборилган.

Қолаверса, Навоий шаҳар ДСИ бошлиғининг 2020 йил 9 июндаги буйруғи билан, бу корхонада камерал солиқ текшируви ўтказилиши белгиланган бўлса-да, буйруқда кўрсатилган 30 кунлик муддат бузилган. Шунингдек, текширув буйруқда белгиланган шахслар, яъни Х.Маманазаров ва А.Ризакуловлар иштирокисиз ўтказилган.

Суд барча ҳужжатларни ўрганиб чиқиб, Навоий шаҳар солиқ инспекциясининг 2020 йил 24 июлдаги «Zarafshan Golden Group» МЧЖга нисбатан 3 млрд 86 млн сўмдан ортиқроқ солиқ ҳисоблаш ва 617 млн 214 минг сўм молиявий жарима қўллаш тўғрисидаги қарорини ғайриқонуний деб топди.

Суд қароридан норози бўлган солиқ инспекцияси юқори судга аппеляция шикояти киритди. Навоий вилоят маъмурий суди апелляция судлов ҳайъати эса Навоий шаҳар давлат солиқ инспекциясининг апелляция шикоятини қаноатлантирмади. Биринчи суд қарори ўзгаришсиз қолди.