Фарғона вилоятининг Тошлоқ туманидан юкланган 1 тонна қуритилган ўрик маҳсулотида карантин объекти ҳисобланган 2 та «Капр қўнғизи» личинкаси топилган.
Жорий йилнинг 3 декабр куни Россельхознадзор расмий веб сайтида Ўзбекистондан Россия Федерациясига экспортга жўнатилган қуритилган ўрик маҳсулотида «Капр қўнғизи» аниқлангани ҳақида хабар берилганди.
Таъкидланишича, мазкур ҳолат юзасидан Ўсимликлар карантини давлат инспекцияси раҳбарияти «Россельхознадзор» карантин хизмати раҳбарияти билан тезкор равишда онлайн музокаралар олиб борди.
«Россия томонидан юборилган фотосуратлар Марказий карантин лабораторияси ходимлари иштирокида текширилиб, кўрсатилган мазкур карантин объекти айнан «Капр қўнғизи» эмас, балки Марказий Осиё ва Россия Федерациясида тарқалган «Trogoderma» оиласига мансуб бошқа қўнғиз эканлиги тахмин қилинмоқда», — дея хабар бермоқда «Ўздавкарантин» инспекцияси.
Маълум қилинишича, онлайн музокаралар давомида Россия Федерацияси томонидан қуритилган ўрик маҳсулоти учун тақиқ қўйилмасликка келишилиб, фақатгина маҳсулот юкланган экспортер корхонага нисбатан фитосанитар чоралар кўрилиши ҳақида аҳдлашувга эришилди.
«Тезкор олинган маълумотга кўра, ушбу тадбиркор Россия Федерациясидан қуритилган ўрик маҳсулотининг эски ҳосилини юклаш бўйича буюртма олган. Экспорт сиғимини тўлдириш мақсадида ҳудуддаги деҳқон бозорларидан эски ҳосилларнинг қолдиқларини турли жойлардан тўплаб, маҳсулот йиғган. «Ўздавкарантин» инспекцияси мазкур ҳолатдан сўнг шуни эълон қиладики, Ўзбекистон Республикасидан хорижга юкланадиган барча турдаги қуритилган маҳсулотлар тўлиқ фумигация қилиниши, маҳсулот фитосанитар тозалигини қатъий назоратдан ўтказиб, фитосанитар сертификати расмийлаштирилиб берилгандагина экспортга чиқарилади», — дея қўшимча қилинади хабарда.
Аввалроқ, Россия Федерациясининг Ветеринария ва фитосанитария бўйича федерал хизматининг («Россельхознадзор») расмий веб-сайтида Ўзбекистондан Россияга қалампир ва помидор маҳсулотларининг кириб келиши учун вақтинчалик тақиқ қўйилгани тўғрисида хабар берилганди.
