"Россельхознадзор" Фарғона вилоятидан Россияга ўсимлик маҳсулотларини олиб киришга қўйилган вақтинча тақиқни бекор қилди

Россия Федерациясининг Ветеринария ва фитосанитария назорати бўйича федерал хизмати (Россельхознадзор) Фарғона вилоятидан барча турдаги ўсимлик маҳсулотларини олиб киришга қўйилган вақтинча тақиқни олиб ташлади.

 “Ўзбекистон Вазирлар Маҳкамаси ҳузуридаги Ўсимликлар карантини давлат инспекциясининг Россия Федерациясига экспорт қилинаётган маҳсулотларнинг фитосанитария сертификатлаш борасида назоратнинг кучайтирилгани ҳақидаги маълумотидан келиб чиқиб, “Россельхознадзор” 2021 йил 7 апрелдан бошлаб Ўзбекистон томонининг берган кафолатларига асосланиб, Россия Федерацияси ҳудудига Ўзбекистон Республикасининг Фарғона вилоятидан помидор ва қалампирдан бошқа барча ўсимлик маҳсулотларини олиб киришга рухсат беради”, дейилади "Россельхознадзор" хабарида.

Аввалроқ, Россиянинг Ветеринария ва фитосанитария бўйича федерал хизмати 1 тонна импорт қилинган қуритилган ўрикда капер қўнғизи аниқлангани важи билан Фарғона вилоятида етиштирилган барча ўсимлик маҳсулотига тақиқ жорий этгани ҳақида хабар берилганди.

Бундан ташқари, Фарғона вилоятидан экспорт қилинган булғор қалампири ва помидор таркибида зараркунанда топилгани важи билан ушбу ҳудуддан айни маҳсулотларни импорт қилишга тақиқ қўйилганди.