Россиядаги бюджет ташкилотлари ходимлари коронавирусга қарши вакцина синовида қатнашишга мажбур қилинган — Reuters  

Россиядаги бюджет муассасалари ходимлари коронавирусга қарши ишлаб чиқилган «Спутник V» вакцинаси синовида қатнашишга мажбур қилинган, деб ёзмоқда Reuters агентлиги.

«Ҳамкасблар!!! Бу қандай саботаж??? Кимни алдамоқчисизлар??? Коронавирусга қарши вакцина – мутлақ устуворлик!!!» — Reuters’нинг ёзишича, Москва шаҳар мулк департаменти амалдори Сергей Мартьянов қўл остидаги ходимларига ана шу мазмунда хабар жўнатган.

Маълумот берилишича, Мартьянов бир неча ходим гриппга қарши эмлашга ёзилганидан сўнг ана шундай мурожаат билан чиққан. Сабаби, бу эмланишдан сўнг «Спутник V» билан эмланишга имкон қолмасди.

Мартьянов, шаҳар мулк департаменти раҳбари ва Москва мэрияси агентликнинг бу борадаги сўровини жавобсиз қолдирган. Москва соғлиқни сақлаш департаменти эса агентликка вакцина иккита клиник синовдан муваффақиятли ўтгани ва хавфсиз эканлигини кўрсатгани, шаҳар аҳолиси тадқиқотда иштирок этиш тўғрисидаги қарорни ихтиёрий равишда қабул қилаётганини билдирган.

Reuters маълумотига кўра, октябрда Москвадаги 3-поликлиника бош шифокори ўринбосари Ольга Цветкова қўл остидаги ходимлар билан WhatsApp орқали ёзишмаларида вакцинациядан бош тортганлар ишдан бўшатилишини билдирган.

«Клиникамиздаги барча ходимларнинг COVID-19га қарши мажбурий вакцинациядан ўтишлари буюрилган. Бу Москва соғлиқни сақлаш департаменти юритувида. Агар вакцинациядан бош тортсангиз, ишдан бўшатилишингиз мумкин. Бунинг учун қонуний база бор», — дея унинг хабаридан иқтибос келтиради агентлик.

3-поликлиника вакили Reuters’га берган изоҳида, вакцинация тўғрисидаги буйруқ ходимларга ғамхўрлик даражасидан дарак бериши ҳамда «ходимлар вакцинация борасидаги қарорни ихтиёрий ва фақат тиббий текширувдан сўнг қабул қилаётгани»ни айтган. Москва соғлиқни сақлаш департаменти «гўёки 3-поликлиникада шифокорларнинг оммавий ишдан бўшатилиши ва вакцинацияга мажбурланаётганлиги» ҳақидаги хабарни рад этди.

Reuters журналистлари шунингдек, октябр ва ноябрда Москвадаги 13 та эмлаш марказида бўлиб, 32 нафар ташриф буюрувчи билан суҳбатлашган. Уларнинг 30 нафари вакцинация тўғрисида иш жойида айтилганини билдирган, 23 нафари ҳақиқий кўнгилли эканини, 9 нафари эса кўнгилли эмаслигини айтган. Агентликнинг қайд этишича, уларнинг барчаси давлат сектори ходимлари бўлган. Уларнинг айримлари иш берувчиларнинг вакцина синовида қатнашиш тўғрисидаги илтимосини рад эта олишмаганини билдирган.

«Бу ерга келишга мажбур бўлдик. Рад этишнинг имкони йўқ, шунчаки мумкин эмас», — деган тез ёрдам хизмати ходими Reuters мухбири билан суҳбатда. Унинг сўзларига кўра, уларга синовларда қатнашиш учун рўйхатга ёзилиш шартлиги айтилган. Агентлик билан суҳбатлашган ўқитувчилардан бири у ишлайдиган мактабга квота ажратилгани ва раҳбарият ходимларни вакцинацияда қатнашишга мажбур қилганини айтган.

«Улар қатнашишингиз кераклигини айтишса, қатнашишингиз шарт», — деган у.

Кўча тозаловчи фаррош эса уларга вакцинацияда қатнашиш шартлиги, чунки кўчада кўпчилик билан юзма-юз келишлари айтилганлигини билдирган.

2 декабр куни Россия президенти Владимир Путин келгуси ҳафтадан коронавирусга қарши «кенг миқёсда»ги вакцинацияни бошлаш топшириғини берди. Унинг сўзларига кўра, вакцинани биринчи навбатда шифокорлар ва ўқитувчилар олади. Москвада оммавий эмлаш 5 декабрда бошланади.