Австралияликларга коронавирусга қарши кураш доирасида хорижга чиқиш ва круиз саёҳатларига жўнашга тақиқлов яна 3 ойга узайтирилди. Бу ҳақда мамлакат соғлиқни сақлаш вазири Грег Хантга таяниб The New Daily портали хабар берди.
Хантнинг таъкидлашича, 2015 йилда қабул қилинган биохавфсизлик ҳақидаги қонунга кўра, биологик хавфсизликнинг фавқулодда даври яна 3 ойга узайтирилди.
Австралияни тарк этишга аввалги тақиқлов 17 декабрда ўз поёнига етиши керак эди. Эндиликда у камида 17 мартгача амал қилади.
“Австралия халқаро ҳамжамият хавфсизликда бўлмагунча тўлиқ хавфсизликда бўлмайди. Хорижда хавфлар улкан, агар биз ушбу муҳим чораларни қўллаб-қувватламасак, австралияликларни ҳимоя қилмаган бўламиз”, деб айтган Хант.
Австралияда сўнгги суткада битта касалланиш ҳолати қайд этилган. Айни вақтда мамлакатда 42 киши инфекциядан даволанмоқда. Австралияда коронавирус тарқалиши маркази бўлган Виктория штатида 39 кундан бери касалланиш ҳолати қайд этилмаган. Мамлакатда умумий ҳисобда пандемия бошидан бери 28 минг киши вирусга чалинган, 908 киши инфекциядан вафот этган.
