Қонунларга тадбиркорлик фаолиятини амалга оширишни соддалаштирувчи тузатишлар киритилди 

Қонун ҳужжатларига турли соҳаларда тадбиркорлик фаолиятини амалга оширишни соддалаштирувчи тузатишлар киритилди. Бу ҳақда Norma хабар бермоқда.
 
Биринчи тузатиш – “Тадбиркорлик фаолияти эркинлигининг кафолатлари тўғрисида”ги қонунга. Якка тартибдаги тадбиркорлар - ҳунармандлар кўпи билан 5 нафар шогирдни жалб қилишлари мумкин бўлган шарт бекор қилинди. Уларнинг сони энди чекланмайди.
 
Иккинчиси – қимматбаҳо металларни олтин изловчилар усулида кавлаб олиш учун ер қаъри участкалари, жумладан сочма олтин конларининг энг юқори ўлчамлари 1 гектардан 5 гектаргача оширилди. Тегишли ўзгартиришлар “Ер ости бойликлари тўғрисида”ги қонунга киритилди. 
 
Учинчиси - корхоналар, муассасалар ва ташкилотлар тугатилаётганда ўзларининг архив ҳужжатларини энди давлат ёки нодавлат архивларига топширишга ҳақлидирлар. Бу “Архив иши тўғрисида”ги қонунда мустаҳкамланган. Илгари қонун бундай танлов имкониятини тақдим этмаган – ҳужжатлар фақат давлат архивига топширилган.
 
Қонун 4.12.2020 йилдан кучга кирди.