Одам савдосидан жабрланган шахсларга ёрдам бериш маркази Ташқи меҳнат миграцияси агентлиги тасарруфига ўтказилади

Одам савдосидан жабрланган шахсларга ёрдам кўрсатиш ва уларни ҳимоя қилишни такомиллаштириш мақсад қилинган.

Вазирлар Маҳкамасининг “Одам савдосидан жабрланганларга ёрдам кўрсатиш ва уларни ҳимоя қилишни такомиллаштириш чоралари тўғрисида”ги қарори лойиҳаси эълон қилинди.

Бандлик ва меҳнат муносабатлари вазирлиги, Соғликни сақлаш вазирлиги, Молия вазирлиги, Ички ишлар вазирлиги, Бош прокуратуранинг Одам савдосидан жабрланган шахсларга ёрдам бериш бўйича Республика реабилитация марказини Соғлиқни сақлаш вазирлиги таркибидан белгиланган тартибда Бандлик ва меҳнат муносабатлари вазирлиги ҳузуридаги Ташқи меҳнат миграцияси агентлиги тасарруфига ўтказиш тўғрисидаги таклифи маъқулланиши мумкин.

Одам савдосидан жабрланганларга ёрдам кўрсатиш ва уларни ҳимоя қилиш бўйича ихтисослаштирилган марказлар тўғрисидаги намунавий низом тасдиқланади.

Қуйидагилар одам савдосидан жабрланган ҳамда жабрланган деб тахмин қилинаётган шахсларга ёрдам бериш бўйича ихтисослаштирилган реабилитация марказларининг асосий вазифалари ва функциялари ҳисобланади:

одам савдосидан жабрланган ҳамда жабрланган деб тахмин қилинаётган шахсларни қулай яшаш шароитлари ва шахсий гигиена воситалари билан таъминлаш;
одам савдосидан жабрланган ҳамда жабрланган деб тахмин қилинаётган шахсларни озиқ-овқат, дори воситалари ва тиббий буюмлар билан таъминлаш;
одам савдосидан жабрланган ҳамда жабрланган деб тахмин қилинаётган шахсларга шошилинч тиббий, психологик, ижтимоий, ҳуқуқий ёрдам ва бошқа ёрдам кўрсатиш;
одам савдосидан жабрланган ҳамда жабрланган деб тахмин қилинаётган шахслар хавфсизлигини таъминлаш;
одам савдосидан жабрланган ҳамда жабрланган деб тахмин қилинаётган шахсларнинг қариндошлари, ҳомийлари ва васийлари билан алоқа ўрнатишига кўмаклашиш;
одам савдосидан жабрланган ҳамда жабрланган деб тахмин қилинаётган шахсларни ўз ҳуқуқлари ва қонуний манфаатлари ҳақида ахборот тақдим этиш;
одам савдосидан жабрланганларнинг ижтимоий реабилитациясига ва мослашувига кўмаклашиш.

Ихтисослаштирилган марказлари одам савдосидан жабрланган ҳамда жабрланган деб тахмин қилинган шахсларга комплекс хизматлар кўрсатади.

Ихтисослаштирилган марказларга жойлаштириш одам савдосидан жабрланган ҳамда жабрланган деб тахмин қилинган шахсларнинг ихтиёрий хоҳиши ҳамда ихтисослаштирилган марказнинг директори, ички ишлар органлари ҳамда тегишли ҳудудий комиссиялари томонидан қабул қилинадиган қўшма қарор асосида амалга оширилади.