АҚШда коронавирусга қарши эмлаш бошланди

АҚШда 14 декабрда коронавирусга қарши биринчи эмлаш ўтказилди. Pfizer ва BioNTech компанияларининг вакцинаси Ню-Йоркнинг Куинс туманидаги шифохона ҳамшираси Сандра Линдсига киритилди. Бу ҳақда АҚШ президенти Дональд Трамп эълон қилди.

Фото: AFP

Шу муносабат билан Ню-Йорк штати маъмурияти ташкил этган жонли эфир вақтида губернатор Эндрю Куомо “бу вакцина Ню-Йоркда ва эҳтимол, АҚШда қилинган биринчи вакцина” эканини таъкидлаб ўтган. “Бу вакцина жуда муҳим, чунки, ўйлашимча, унинг қўлланиши пандемияга қарши урушнинг якунланишини бошлаб беради. Бу китобнинг якуний бобидир”, деб айтган Куомо.

АҚШда 11 декабрда Pfizer ва BioNTech вакцинасини қўллашга рухсат берилганди. Тегишли мутахассислар вакцинанинг самарадорлиги иккинчи дозаси киритилгандан кейин 95 фоизни ташкил қилиши тасдиғини олишган.

Бир кишига икки доза вакцина киритиш талаб этилади. Улар 21 кун оралиқ билан киритилади.

ЖССТ маълумотларига кўра, айни вақтда дунёда коронавирусга қарши вакцинани ишлаб чиқиш бўйича 170га яқин лойиҳа амалга оширилмоқда.

#АҚШ #вакцина

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.