Швейцарияда коронавирусга қарши эмлаш кампанияси бошланди

23 декабрда Швейцарияда Pfizer/BioNTech компанияларининг коронавирусга қарши вакцинаси билан биринчи эмлаш амалга оширилди. Вакцина Люцерн регионидаги қариялар уйида яшовчи 90 ёшли аёлга киритилган.

Фото: swissinfo.ch

Swiss Info нашрининг хабар беришича, аҳолини эмлашнинг асосий қисми 4 январдан бошланади. Вакцинани биринчи навбатда юқори хавф гуруҳига кирувчи кишилар (75 ёшдан катталар, сурункали касалликларга эга бўлганлар, сўнгра 65 ёшдан катталар); тиббий ходимлар ёки беморларга қаровчи ёки улар билан яқин алоқада бўлувчилар; юқори хавф гуруҳига кирувчи одамлар билан яқин алоқада бўлувчилар; вирус тарқалиши хавфи юқори бўлган жойларда яшовчилар ёки ишловчилар олади.

Бир неча кун аввал мамлакатнинг мутасадди идоралари Pfizer/BioNTech вакцинасини қўллашга рухсат берган. Бу буюртирилган 3 млн доза вакцинадан биринчи 107 мингтасини олишга имкон берган.

Швейцарияда бошқа вакциналар, жумладан Moderna ва AstraZeneca компаниялари вакциналари ҳам қўллаш учун кўриб чиқилмоқда. 8,5 млн аҳолига эга Швейцария ушбу компаниялардан ҳаммаси бўлиб 15,8 млн доза вакцина буюртирган.

Тайёрлаган Шуҳрат Раҳимов

#Швейцария #вакцина #эмлаш

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.