Германияда жуфтининг вафоти учун йиғлаётган оққуш 23 та поездни тўхтатиб қўйди

Маҳаллий полиция ахборотига кўра, Кассель ва Геттинген ҳудудларини боғловчи темир йўлда бир неча кун аввал иккита оққуш пайдо бўлган. Улардан бири электр уриши оқибатида ҳалок бўлган. Омон қолган оққуш эса жуфтининг вафотидан кейин темир йўлни тарк этмаган. Оққушлар одатда жуфтининг вафотидан кейин бошини қуйи солиб йиғлайди ва шу тарзда аза тутади.

Темир йўлда оққуш турганини кўрган ҳайдовчи поездни тўхтатишга мажбур бўлган. Поезддагилар йўлдан ҳайдаб юборишга ҳаракат қилганига қарамай, қуш кетмаган. Воқеа жойига маҳаллий ўт ўчирувчилар етиб бориб, махсус техника воситасида оққушни унга зарар етказмай йўлдан олиб, Фульда дарёсига қўйиб юборишган.

Оққушни қутқариш операцияси бир соатга яқин давом этган ва бу вақт давомида 23 та поезд тўхтаб қолган.