Вакцинациянинг ҳозирги суръатида АҚШга коронавирусга қарши курашиш учун 10 йил керак бўлади – ОАВ

“Ғаройиб тезлик” операциясига кўра, июн ойига келиб 330,7 млн нафар АҚШ аҳолисининг 80 фоизи коронавирусга қарши эмланиши лозим.

Фото: Getty Images

АҚШда вакцинациянинг ҳозирги суръатида мамлакатдаги коронавирус эпидемиясини бартараф этиш учун ўн йилга яқин вақт керак бўлади. Бу ҳақда вазият таҳлилларига асосланиб NBC News ёзмоқда.

"NBC News АҚШ маъмуриятининг коронавирус тарқалишига қарши кураш бўйича дастурининг амалдаги суръатини таҳлил қилиши шуни кўрсатдики, америкаликларни етарлича вакцинация қилиш ва пандемияни назоратга олиш учун қарийб ўн йил керак бўлади", - дейилади мақолада.

Қайд этилишича, “Ғаройиб тезлик” операциясига кўра, июн ойига келиб 330,7 млн нафар АҚШ аҳолисининг 80 фоизи коронавирусга қарши эмланиши лозим.

"Бу мақсадга эришиш учун кунига 3 миллиондан ортиқ киши эмланиши керак. Аммо ўтган икки ҳафта давомида атиги 2 миллионга яқин киши эмланди", - дея қайд этади NBC News.

Ҳозирда эмланганларнинг аксарияти шифокорлар ёки қариялар уйида яшайдиган кексалардир.

Аввалроқ АҚШнинг сайланган президенти Жо Байден вакцинацияни тезлаштириш учун ҳарбий давр қонунидан фойдаланилишини айтганди.

Тайёрлаган Дилшод Аскаров

#АҚШ #вакцина

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.