Трамп АҚШ Ҳўрмуз бўғозидан кемаларнинг ўтиши учун ҳақ олишини эълон қилди

АҚШ, эҳтимол, Ҳўрмуз бўғозини ўз назоратига олади ва у орқали кемаларнинг хавфсиз ўтишини таъминлагани учун пул ундириш ниятида, деб эълон қилди Доналд Трамп.

Fox News телеканалига берган интервьюсида Трамп Қўшма Штатлар бўғознинг «қўриқчи фаришталарига» айланишини ва ўз саъй-ҳаракатлари учун компенсация олиши кераклигини айтди.

«Бизга уни қўриқлаш учун катта пул тўлашади, - деди Трамп. — Бизга пулни қоплаб беришади, чунки бошқа мамлакатлар жуда бой. Улар бизнинг томонимизда ва биздан буни бепул қилиш кутилмайди».

Трампнинг айтишича, АҚШ кемаларнинг Ҳўрмуз бўғозидан ўтиши учун оладиган тўлов ташиладиган юк қийматининг 20 фоизини ташкил этади.

Ҳўрмуз бўғози жаҳон нефт транзитида муҳим рол ўйнайди. АҚШ ва Исроилнинг Эрон билан уруши бошланишидан олдин дунё нефт транзитининг 20 фоизигача бўлган қисми Ҳўрмуз бўғози орқали ўтган. Уруш бошланганидан сўнг Эрон бўғозни кемалар ўтиши учун ёпиб қўйди, бу эса жаҳон бозорида нефт нархининг кескин ошишига сабаб бўлди. АҚШ, ўз навбатида, денгиз блокадасини жорий этиб, кемаларни Эрон портларига ўтказмади.

Ҳўрмуз бўғозини кемалар ўтиши учун очиш масаласи АҚШ ва Эрон ўртасидаги музокараларнинг асосий масалаларидан бири эди. Июн ойи ўрталарида Вашингтон ва Теҳрон ўзаро англашув меморандумини имзолади. Ҳужжатда 60 кунга ўт очишни тўхтатиш ва Ҳўрмуз бўғози бўйлаб кемалар ҳаракатини қайта тиклаш кўзда тутилган эди. Июл ойи бошида Трамп Эрон билан ўт очишни тўхтатиш режими «тугади» деб ҳисоблаганини эълон қилди. Эрон, ўз навбатида, Ҳўрмуз бўғозини ёпаётганини маълум қилди.