Финландияда Pfizer вакцинасининг ножўя таъсири билан боғлиқ илк ҳолат қайд этилди

Европа дори воситалари агентлиги ўтган йилнинг 21 декабрида Pfizer/BioNTech вакцинасидан фойдаланишга рухсат бергач, 27 декабрда Финландияда биринчи бўлиб шифокорлар эмланди.

Фото: AP Photo / Ariel Schalit

Финландиянинг фармацевтика соҳасидаги хавфсизлик ва тараққиёт агентлигига (Fimea) коронавирусга қарши вакцинанинг ножўя таъсири тўғрисидаги дастлабки ариза келиб тушди. Fimea бош шифокори Майя Кауконеннинг сўзларига кўра, ариза мазмуни ҳозирча ошкор қилинмайди.

"Вакцинанинг ножўя таъсири билан боғлиқ камида бешта ариза тушсагина қандай ножўя таъсирлар кузатилгани ҳақида маълумот берамиз", - деди Кауконен.

Европа дори воситалари агентлиги (EMA) ўтган йилнинг 21 декабрида Pfizer/BioNTech вакцинасидан фойдаланишга рухсат бергач, 27 декабрда Финландияда биринчи бўлиб шифокорлар эмланди.

Ҳозирда Ҳелсинки, Турку, Тампере, Куопио ва Оулу округларидаги шифокорларга вакциналар етказиб берилган.

Pfizer компанияси ишлаб чиқарган вакцина 1 январ куни ЖССТдан расман рухсатнома олди. Ҳозирда Pfizer'га тақдим этилган рухсатнома фавқулодда ҳисобланади ва кейинчалик тўлиқ ўрганишлар якунлангач, рухсатнома доимий фойдаланиш учун берилиши мумкин.

Бу вакцинани АҚШнинг сайланган президенти Жо Байден, Исроил бош вазири Бенямин Нетаняҳу, Саудия валиаҳд шаҳзодаси Муҳаммад бин Салмон каби дунё етакчилари қабул қилган. Бугунгача дунё бўйлаб ўн миллионлаб одамлар Pfizer вакцинаси билан эмланиб улгурди.

Тайёрлаган Дилшод Аскаров

#Pfizer #Финляндия

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.