Финляндия президенти: Украинада тинчлик музокаралари йил охиригача бошланиши қийин

Финландия президенти Александер Стуббнинг фикрича, Украинадаги урушда отишмани тўхтатишга 2026 йил баҳоригача эришиш жуда қийин. «Мен, камида шу йилда, отишмани тўхтатишга эришиш ёки тинчлик музокараларини бошлаш масаласида унчалик оптимистик позицияда эмасман», — деди Стубб 16 ноябр куни эълон қилинган AP агентлигига берган интервюсида. У шунингдек, келаси йил март ойигача «бирор чора кўриш» имкони бўлса, бу яхши бўлишини қўшимча қилди.

Финландия президенти отишмани тўхтатиш йўлида энг муҳим, деб ҳисоблайдиган уч масалани санаб ўтди: Украина учун хавфсизлик кафолатлари, унинг иқтисодиётини тиклаш ва ҳудудий даъволар бўйича ҳеч бўлмаганда қандайдир ўзаро тушунишга эришиш.

Украинада тинчликка эришиш учун, Александр Стуббнинг фикрича, АҚШ президенти Доналд Трамп ва Европа лидерлари Россияга ва унинг президенти Владимир Путинга нисбатан ҳарбий босимни имкони борича кучайтириши керак, шунда унинг стратегик фикрлаши ўзгариши мумкин. Финландия раҳбари таъкидлаганидек, Путиннинг мақсадлари тўлиқ миқёсли уруш бошланганидан бери ўзгармаган: аслида, у ҳанузгача Украинани мустақиллиги, суверенитети ва ҳудудий яхлитлигидан маҳрум қилишни истайди.

Москвага ҳарбий босим ўтказишдан ташқари, Стубб Европада музлатиб қўйилган Россия активларини Украинани молиялаштиришни таъминлаш учун гаров сифатида ишлатиш тарафдори.

Александер Стубб АҚШнинг Россия энергетика компаниялари — «Лукойл» ва «Роснефть»га нисбатан жорий этган санкцияларини юқори баҳолади, бироқ, президентнинг фикрича, Украинанинг Россия «ҳарбий ёки мудофаа саноати»га зарба бериш имконияти пайдо бўлиши учун яна кўпроқ иш қилиш зарур.

Унинг таъкидлашича, Украинадаги ҳозирги коррупция можароси Россия манфаатига хизмат қилмоқда, шу боис Украина президенти Володимир Зеленский барча айбловлар бўйича тезда аниқлик киритиши керак. Украина томонидаги айрим хатоларни тан олган бўлса-да, Александр Стубб Зеленскийни мақтади, деб қайд этади AP. «Мен унинг кўплаб ҳаракатларига ҳурмат билан қарайман, чунки уруш даврида мамлакатни бошқариш — бу экзистенциал масаладир», — деб тушунтирди у.