Эрон Жанубий Кореяга қарашли танкерни ушлади

Эроннинг Ислом инқилоби муҳофизлари корпуси кучлари Форс кўрфазида Жанубий Корея байроғи остида сузган танкерни ушлаб, уни Эрон соҳилидаги портга олиб борди. 

Эрон расмийларининг фикрича, нефт-кимё маҳсулотларини ташишга мўлжалланган танкер атроф-муҳитни ифлослантирган.

Таъкидланишича, Hankuk Chemi деб номланган танкер Саудия Арабистонидаги Ал-Жубайл портини тарк этгандан бери бир неча марта экологик қоидаларни бузган. Энди танкер иши билан Эрон суд органлари шуғулланади.

Жанубий Корея ташқи ишлар вазирлиги ушланган кема Эрон сув ҳудудларига йўналаётганини тасдиқлаган. Таъкидланишича, воқеа жойига Жанубий Кореянинг қароқчиликка қарши кураш бўлими кучлари йўл олган.

Жанубий Корея мудофаа вазирлиги воқеа жойи яқинида ҳаракат қилувчи кўп миллатли ҳарбий-денгиз кучлари билан ҳамкорликда ушбу вазият билан шуғулланишини маълум қилган. 

Кема экипажи 20 кишидан, жумладан 5 нафар кореялик, 11 нафар бирмалик, 2 нафардан индонезиялик ва ветнамликдан иборат бўлган.

Кема оператори - DM Shipping компанияси вакили кема ушланиши вақтида очиқ денгизда бўлганини, у атроф-муҳитни ифлослантирмаганини маълум қилган. 

Аввалроқ, 2 январда CNN телеканали манбалари Эрон Форс кўрфазидаги ҳарбий-денгиз кучлари бўлинмалари жанговар шайлиги даражасини оширганини маълум қилган. Телеканал тахминига кўра, Теҳроннинг ҳарбий фаоллиги “Ал-Қудс” бўлинмаси қўмондони генерал Қосим Сулаймоний ўлдирилганининг бир йиллиги арафасида кучайтирилган.