БАА Ҳўрмуз бўғозига муқобил йўналиш қуради - ОАВ 

Дубай порт оператори DP World Бирлашган Араб Амирликларининг шарқий қирғоғида муҳим Жабал Али портига қарамликни камайтириш ва Ҳўрмуз бўғозини четлаб ўтиш учун янги порт ва контейнер терминалини қуришни режалаштирмоқда, деб ёзди Financial Times.

Газета манбаларига кўра, Дубай порт оператори Фужайра қирғоқ зонасида мутлақо янги кўп функцияли порт ва амирликнинг мавжуд бандаргоҳида янги терминал қуриш бўйича музокаралар олиб бормоқда. Порт қувватларининг бир қисмини Дубайдан ташқарига кўчириш Жабал Алининг ўсиши туфайли глобал савдо ва молия маркази мақомини олган амирлик учун туб ўзгаришларни англатади.

DP World режалари БАА ҳукуматининг АҚШ ва Исроил ҳужумларидан сўнг Эрон дронлари ва ракета ҳужумларидан жабр кўрган бўғозга қарамликни камайтириш орқали мамлакат иқтисодиётини Эроннинг келажакдаги эҳтимолий душманлик ҳаракатларидан ҳимоя қилишга қаратилган кенг қамровли ташаббусига мос келади.

Янги лойиҳа DP World компаниясининг Ўмон кўрфазидаги фаолиятини кенгайтириб, контейнерларга бўғоз орқали ўтмасдан мамлакатга кириш ва ундан чиқиш имконини беради, шундан сўнг улар қуруқлик орқали Дубай, Абу-Даби ва Форс кўрфазидаги қўшни мамлакатларга юк машиналари орқали ташилади.

Эрон АҚШ ва Исроил зарбаларига жавобан бўғозни ёпганидан сўнг, Жабал Алидаги фаоллик 90-95 фоизга камайди, бу эса порт операторини денгиз йўлига муқобил йўлларни излашга ундади. Қайд этилишича, DP World ҳозир ҳукумат амалдорлари билан келишувнинг дастлабки шартларини муҳокама қилмоқда, янги лойиҳанинг тузилиши ва молиялаштирилиши эса ҳали тўлиқ маълум эмас. Компания юқори мартабали вакилининг сўзларига кўра, янги порт бир ярим йил ичида қуриб битказилиши мумкин.

Ўтган йили 15,6 миллион йигирма футлик контейнерларга ишлов берган Жабал Али порти Дубайнинг глобал логистика ва реэкспорт марказига, хусусан, Хитой ва Африка ўртасида шаклланишида муҳим рол ўйнади. Бироқ, унинг жойлашуви портни Эрон ва Уммон ўртасидаги тор сув йўлига боғлиқ қилиб қўймоқда.