Жонсон Буюк Британия шифохоналари максимал даражада тўлганини маълум қилди

Ўтган суткада мамлакатда коронавирус юқтириш ҳолатлари билан боғлиқ рекорд – 68053та ҳолат қайд этилган. Шунингдек, ўлим ҳолатлари бўйича антирекорд ҳам янгиланган - 1325та ўлим.

Фото: Toby Melville/AP

Буюк Британия соғлиқни сақлаш тизими коронавирус пандемияси бошланганидан буён мамлакатдаги шифохоналарнинг максимал даражада тўлиши ҳолатига дуч келди. Бу ҳақда мамлакат бош вазири Борис Жонсон маълум қилди.

"Шифохоналаримиз пандемия бошланганидан буён энг кучли босим остида қолди, касалланиш суръати эса хавотирли тезликда ошмоқда", - деб ёзди у твиттерда.

Жонсоннинг қайд этишича, "вакцина бизга янги умид берди, аммо ҳозир уйда қолиш, миллий соғлиқни сақлаш хизматини ҳимоя қилиш ва одамлар ҳаётини сақлаб қолиш жуда муҳим".

Британия ОАВнинг хабар беришича, ўтган суткада мамлакатда коронавирус юқтириш ҳолатлари билан боғлиқ рекорд – 68053та ҳолат қайд этилган. Шунингдек, ўлим ҳолатлари бўйича антирекорд ҳам янгиланган - 1325та ўлим.

Sky news телеканалининг экспертлар фикрига таяниб маълумот беришича, Англияда ҳар 50 кишидан бири, Лондонда эса ҳар 30 кишидан бири касалликка чалинган.

8 январ куни Лондонда фавқулодда ҳолат эълон қилинди.

Worldometers сайтининг ёзишича, Буюк Британияда жами касалланиш ҳолатлари 2,95 миллиондан ошган, 79,8 мингдан ортиқ бемор вафот этган.

Тайёрлаган Дилшод Аскаров

#Буюк Британия #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.