Россиялик болалар жарроҳи Юрий Козлов Тошкентда бир нечта мураккаб болалар жарроҳлик операцияларини ўтказди. У айни пайтда Россиядан Ўзбекистонга тўғридан тўғри рейс йўқлиги боис аввалига ўзи истиқомат қиладиган Иркутскдан Москвага, сўнг Истанбулга, шундан кейин Тошкентга учган.
«Вести-Иркутск» дастурида хабар қилинишича, шифокор Тошкентга фарзанд кўришга ҳозирланаётган оиланинг чақируви билан келган. Она ҳомиласида ошқозон-ичак тракти аномалияси ривожланган бўлиб, бола туғилиши биланоқ бир неча соат ичида операция қилиниши зарур эди.
Якунда жарроҳлик амалиёти муваффақиятли ўтган. Эътиборлиси, хирург бу оила фарзандидан ташқари, Республика перинатал марказида 5 кун ичида яна 19 нафар бошқа болаларни ҳам операция қилган.
«Козлов бажарадиган операцияларни қила оладиган шифокорлар дунё миқёсида анчагина кам. Улар орасида бепул операция ўтказадиганлари айниқса саноқли. COVID-19 вақтидаги ҳаракатланиш чекловлари туфайли иркутсклик врач ўзи жажжи беморларининг олдига бормоқда», дейилади хабарда.
Айни пайтда шифокор Тошкентда операция қилган болаларнинг барчасига уйига жавоб берилган.
Маълумот учун, Юрий Козлов – тиббиёт фанлари доктори, олий тоифали болалар жарроҳи, Россияда хизмат кўрсатган шифокор, «Россиянинг энг яхши шифокори» танлови ғолиби. У Ивано-Матренинск болалар клиник шифохонасининг Янги туғилган чақалоқлар хирургияси ва реанимацияси маркази асосчиси ва раҳбари саналади.
