Ўзбекистонда болалар жарроҳлигига оид янги усул патентланди

«Болалар сон суяги проксимал қисми диспластик деформациясини жарроҳлик йўли билан даволаш усули» номли фойдали модел давлат рўйхатидан ўтказилди ва ҳуқуқий муҳофазага олинди.

Яратилган фойдали модел тиббиётда яъни, травматология ва ортопедияда ишлатилади. Усул техник жиҳатдан содда ҳамда нисбатан камроқ шикастланиши билан ажралиб туради.

У пастки оёқ-қўлларни гипс билан иммобилизация қилиш вақтини қисқартиришга имкон беради ҳамда суякларнинг бирлашиши учун қулай шароит ярата олиши сабабли амалий тиббиётда кенг қўлланиши мумкин.

Фойдали моделни рўйхатдан ўтказиш, яъни патент олиш мутлақ ҳуқуқларни ҳимоя қилиш учун зарурдир. У фойдали моделни рухсатсиз бошқалар фойдаланишига йўл қўймаслик ҳуқуқини беради, бу эса уни инсофсиз рақобатдан ҳимоя қилиш ва фойдаланишдан потенциал фойда олиш имконини яратади.

Фойдали моделни рўйхатдан ўтказиш учун Адлия вазирлигининг im.adliya.uz сайти орқали ариза топшириш мумкин.