Қозоғистонда коронавирусга қарши маҳаллий вакцина рўйхатдан ўтказилди

Қозоғистон соғлиқни сақлаш вазирлиги мамлакатда ишлаб чиқилган коронавирусга қарши маҳаллий вакцина QazCOVID-in’ни вақтинча рўйхатдан ўтказди.

Фото: rostec.ru

Вакцина 2020 йил 31 декабрда 9 ойга рўйхатдан ўтказилган. Қозоғистон соғлиқни сақлаш вазири Нурлибек Асилбековнинг маълум қилишича, яқин орада Россияда ишлаб чиқилган “Спутник V” вакцинасини вақтинча рўйхатдан ўтказиш режалаштирилмоқда.

Ҳозирда QazCOVID-in вакцинаси клиник синовларнинг якуний 3-босқичидан ўтмоқда. Қозоғистонда декабрда вакцинанинг 3-босқичи доирасида илк 3 минг кўнгиллининг эмланиши бошланган. Вакцинани март ўрталаридан оммавий равишда ишлаб чиқариш режалаштирилган.

Вакцина Биологик хавфсизлик муаммолари илмий-тадқиқот институти томонидан ишлаб чиқилган. У Жаҳон соғлиқни сақлаш ташкилоти рўйхатига киритилган.

2020 йил декабрда Қарағандадаги фармацевтика мажмуаси негизида Россиянинг “Спутник V” вакцинасининг ишлаб чиқарилиши бошланган. Мажмуада ушбу вакцинадан босқичма-босқич 2 млн доза ишлаб чиқариш ҳамда 2021 йил февралдан у билан аҳолини ихтиёрий равишда оммавий эмлашни бошлаш режалаштирилган.

#Қозоғистон #вакцина #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.