«Ўзгидромет» ҳафталик об-ҳаво тўғрисида маълумот берди

Жорий ҳафтанинг биринчи ярмида республика ҳудудларида об-ҳавони паст босим майдони белгилайди, деб хабар қилмоқда «Ўзгидромет».

Бугун ёғингарчиликсиз об-ҳаво бўлади, фақат республиканинг айрим тоғолди ва тоғли ҳудудларда ёмғир ёғиш эҳтимоли бор. Ҳаво ҳарорати кўп йиллик қийматлардан 8-10 даражага юқори ва 13-18 даража илиқ атрофида бўлади.

19 январда республика ҳудудларининг кўп қисмида ёғингарчиликсиз об-ҳаво сақланиб туради, фақат Қорақалпоғистонда, Хоразм, Тошкент, Самарқанд, Жиззах, Сирдарё вилоятларининг баъзи жойларида бироз ёмғир ёғиши мумкин.

20 январда Қорақалпоғистонда, Хоразм вилоятида ёмғир қорга айланади, Тошкент, Самарқанд, Жиззах, Сирдарё вилоятларида кечаси ва эрталаб баъзи жойларда ёмғир ёғади. Республиканинг қолган ҳудудларида ёғингарчилик кутилмайди.

21 январда республика ҳудудларининг кўп қисмида ёғингарчилик кутилмайди, Қорақалпоғистонда, Хоразм вилоятида қор ёғади, Бухоро, Навоий вилоятларида кечга томон баъзи жойларда ёмғир ёғиши мумкин.

19-21 январда ҳарорат ўзининг кўп йиллик қийматларидан 8-10 даражага юқори бўлади ва кечалари 0-5 даража илиқни, кундуз кунлари 11-16 даража илиқни ташкил этади.

22 январда об-ҳаво кескин ўзгара бошлайди, бунинг сабаби совуқ антициклондир, у мамлакат ҳудудларига қор ва манфий қийматли ҳароратни олиб келади. Нам ҳаво массалари Волгабўйи ҳудудларидан кириб келади. Республика бўйича қор ёғади, фақат мамлакатнинг шимолий ҳудудларида ёғингарчилик кутилмайди. Ҳаво ҳарорати кечаси ва кундузи 2 даража совуқ - 3 даража илиқни ташкил этади.

23 январда антициклон мамлакатнинг барча ҳудудларини қамраб олади, ёғингарчилик бўлиши эҳтимоли кам, лекин жуда совуқ бўлади. Ҳаво ҳарорати кечаси 5-10 даража совуқ, кундузи 2 даража совуқ - 3 даража илиқни ташкил этади. Ўртача кеча-кундузлик ҳаво ҳарорати меъёрдан 6-8 даражага паст бўлади.