Эрон ҳукумати АҚШ маъмуриятининг бир қатор юқори лавозимли шахслари, жумладан президент Дональд Трампни санкциялар рўйхатига киритди. Бу ҳақда Эрон ташқи ишлар вазирлиги расмий вакили Саид Хатибзода маълум қилди.
“АҚШнинг юқори лавозимли расмий шахслари, жумладан президент Дональд Трамп, давлат котиби Майкл Помпео, собиқ мудофаа вазири Марк Эспер, мудофаа вазири вазифасини бажарувчи Кристофер Миллер, молия вазири Стивен Мнучин, МРБ раҳбари Жина Хаспел, президентнинг миллий хавфсизлик бўйича собиқ маслаҳатчиси Жон Болтон, АҚШнинг Эрон бўйича собиқ вакили Брайан Хук, амалдаги вакили Эллиот Абрамс бугунги кундан Эроннинг санкциялар рўйхатига киритилди”, деб айтилган хабарда.
Хатибзоданинг айтишича, юқорида исми тилга олинган шахсларга бир қатор сабаблар, жумладан генерал Қосим Сулаймоний ва унинг сафдошларининг ўлдирилишини ташкиллаштириш, Эронга қарши террорчилик ҳаракатларини қўллаб-қувватлаш, террорчи гуруҳларни молиялаштириш, қуроллантириш ва ўргатиш, эронлик ядрочи олим Муҳсин Фахризоданинг ўлдирилишида Исроилни қўллаб-қувватлаш ва Эронга нисбатан бир томонлама ноқонуний санкциялар киритилишига жавобан санкциялар жорий қилинган.
Эътиборлиси, санкциялар Трамп ўз лавозимини тарк этишига бир кун қолганда киритилган.
