Исроилда Pfizer вакцинаси эълон қилинган даражада самарали эканлиги шубҳа остига олинмоқда

Исроилда Pfizer ва BioNTech компаниялари ҳамкорликда ишлаб чиққан вакцинанинг эълон қилинган даражада самарали эканлиги шубҳа остига олинмоқда. Бу ҳақда мамлакат коронавирусга қарши кураш миллий дастури координатори профессор Наҳман Аш маълум қилди, деб хабар бермоқда The Times of Israel нашри.

Маълумот берилишича, вакцинация бошланганидан бери коронавирусга қарши эмланганларнинг 12,4 мингдан ортиғи биринчи эмлашдан сўнг касалликка чалинган. Улар орасида камида 69 киши вакцинанинг иккинчи дозасини ҳам қабул қилган.

Эшнинг сўзларига кўра, кўпчилик биринчи ва иккинчи эмлаш орасида касаллик юқтирган ва афтидан, биринчи дозанинг ҳимоя даражаси "аввал ўйланганидан кўра самарасизроқ". Унинг қўшимча қилишича, биринчи дозанинг вирусга қарши ҳимоя даражаси тўғрисидаги маълумот "Pfizer компанияси эълон қилганига нисбатан паст".

Аш вакцина вируснинг янги штаммларидан ҳимоя қила олмаслиги тўғрисида огоҳлантирди.

19 январ ҳолатига кўра, 2 миллиондан ортиқ исроиллик Pfizer вакцинасининг биринчи дозасини, 400 мингдан ортиғи эса иккинчи дозасини қабул қилган.

Эслатиб ўтамиз, Pfizer компанияси вакцинаси самарадорлигини 95 фоиз деб баҳолаганди.