Америкалик губернатор Байден устидан судга арз қилишини айтди

АҚШнинг Техас штати губернатори Грег Эбботт АҚШ президенти Жо Байден томонидан иқлим инқирозини енгиб ўтиш бўйича “душманона” режалар илгари сурилаётгани учун Оқ уй раҳбарини судга бериш билан пўписа қилди.

Грег Эбботт / Фото: Getty Images

Эбботт Байденни ушбу ҳаракатлари учун танқид қилиб, Оқ уй раҳбари томонидан иқлим ўзгаришига қарши кураш доирасида имзоланган фармонлар Техасда нефт ва газ қазиб олишга путур етказишини айтган. Губернатор “қуруқ гап” билан чекланиб қолмай, янги президент томонидан маъқулланган ташаббуслар бўйича суд тартибида баҳслашишга имкон берувчи буйруқни имзолаган.

Техас губернатори буйруқни имзолаш вақтида нефт-газ соҳасида иш ўринларини сақлаб қолишга ваъда берган. “Техас нефт-газ саноатини Вашингтоннинг ҳар қандай душманона тажовузларидан ҳимоялайди”, деб таъкидлаб ўтган губернатор.

28 январда Байден давлат ерлари ва денгиз шелфларида нефт ва газ конларини ўзлаштириш учун янги лицензиялар берилишини тўхтатувчи фармонни имзолаган. Бу фармон нефтчиларнинг аччиғини келтирган. Таъкидланишича, фармон иқлим ўзгариши билан курашиш мақсадида имзоланган.

Барак Обама президентлиги вақтида АҚШ атроф-муҳитга чиқарилувчи зарарли моддалар ҳажмини 2025 йилгача 2005 йилдагига нисбатан 26-28 фоизга камайтиришга ваъда берган. Дональд Трамп раҳбарлиги вақтида ушбу жараён деярли тўхтаб қолган.