Испаниядаги қариялар уйида яшовчиларнинг барчасида вакцина билан эмланганидан сўнг коронавирус аниқланди

Қариялар уйи раҳбариятининг таъкидлашича, эмлаш вақтида барча санитария меъёрларига амал қилинган.

Фото: AFP

Испаниянинг Латартера шаҳридаги қариялар уйида яшовчиларнинг барчаси COVID-вакцина билан эмланганидан сўнг коронавирусга чалинди. Етти киши вафот этди, деб ёзмоқда La Vanguardia.

Хабар қилинишича, қариялар Pfizer компанияси вакцинаси билан эмланган. Шундан кейин муассасада яшовчи 78 кишининг барчасида коронавирус аниқланган.

Улар вакцинанинг биринчи дозасини 13 январда олишган.

"Олти кундан кейин 10 кишида дастлабки симптомлар пайдо бўла бошлади", - деган муассаса маъмурияти вакили.

Қариялар уйи раҳбариятининг таъкидлашича, эмлаш вақтида барча санитария меъёрларига амал қилинган. Пандемия бошланганидан буён бу ерда бирорта ҳам касалликка чалиниш ҳолати бўлмаганлиги айтилмоқда.