Блинкен Туркияни С-400дан воз кечишга чақирди

АҚШ давлат котиби Энтони Блинкен Туркия ташқи ишлар вазири Мавлут Човушўғлу билан телефон орқали мулоқоти чоғида Анқарани Россиянинг С-400 зенит-ракета тизимларидан воз кечишга чақирди.

"Давлат котиби Туркияни Россиянинг с-400 ракета тизимларини ўзида қолдирмасликка чақирди. Энтони Блинкен Туркия ва Греция ўртасида давом этаётган музокараларни қўллаб-қувватлашини билдирди", - дейилади АҚШ давлат департаменти хабарида.

Икки мамлакат ташқи ишлар вазирлари мулоқоти ҳақида Туркия ташқи ишлар вазирлиги ҳам хабар берди. Вазирликнинг хабарига кўра, "икки томонлама муносабатларнинг барча жиҳатлари", жумладан, Россия зенит-ракета тизимлари муҳокама қилинган.

Туркия ва АҚШ ўртасидаги муносабатларда совуқчилик тушишига сабаб бўлган С-400 тизимлари Туркияга 2019 йил июлдан бошлаб етказилганди.

Вашингтон Анқарага ушбу битимдан воз кечишни ва Туркияга F-35 қирувчи самолётлари сотишни бекор қилиш ва санкциялар киритиш билан таҳдид қилиб, С-400 ўрнига АҚШнинг Patriot мажмуаларини сотиб олишни таклиф қилганди.

11 январ куни Туркия мудофаа саноати котибияти раҳбари Исмоил Демир С-400 зенит-ракета тизимлари фойдаланишга тайёр ҳолга келтирилганини маълум қилди.